TOERUSTING
Maak seker jy’s reg gestewel en gespoor as die wandelpad roep – hier’s opsies vir dagstappe, lang afstande en veeldagstappe
VIR DAGSTAPPE
Jou skoeisel moet stewig en gemaklik wees en goeie onder
steuning bied.
1 Hi-Tec V-Lite Wild-Life
Indien jy verkies om dagstappe in stewels te doen sal ’n bekostigbare, liggewig paar werk. Veral ’n mooi paar soos Hi-Tec se V-Lite. Dit het minder rubber op die buitesool en is gemaak van liggewig materiaal wat die stewels veerlig aan jou voete laat voel. Die boonste deel is gemaak van duursame sintetiese materiaal, en binne is OrthoLitesole. Die hak is glytraag.
Die enigste ding wat ek mis, is sole soos Vibram of Michelin; daai soort rubber is wel oordadig, maar die sole gaan vir jare hou.
R1 300 by hi-tec.co.za; beskikbaar slegs vir mans
2 Merrell Chameleon 7 Slam
Die skoenbedryf beweeg ál meer na veerligte veldloopskoene wat dié Merrells uit die oude doos laat lyk. Herinner dit jou aan jou oom se paar toe julle in ’97 gaan kamp het?
Tog het dié skoene oorleef omdat hulle nie skreeulelik is nie, en dit duursaam en gemaklik is.
Die sole is Vibram, die boonste gedeelte is mooi en kan asemhaal, en dis goed beskerm in dele wat gou verslyt. Dis ongelukkig nie waterbestand nie, en kan teleurstel in die Kaapse winter, maar is geskik vir droër uitstappies.
R1 900 by Cape Union Mart (beskikbaar slegs vir mans)
3 Adidas AX2 Mid GTX Boot
Ja, ons weet jy is dol op jou Adidastekkies, maar hulle gaan jou nie ver bring in die Drakensberg nie...
Wat dus van hierdie enkelhoogte stewels, wat ondersteuning in die regte plekke bied? Jou enkels is ook veilig. Al is dit stewels, laat die sintetiese materiaal die stewels meer soos veldloopskoene voel. Daarby is die stewels waterbestand met ’n Gore-Tex-membraan, en die sole spog met Adidas se Traxion- tegnologie... ag wat, dit beteken maar net die sole is taai met ’n goeie greep. Hierdie stewels gaan nou nie Kili baasraak nie, maar is goed genoeg as jy langnekke wil gaan kyk in die Groenkloof.
R2 000 by Cape Union Mart (beskikbaar vir mans en vroue)
4 La Sportiva TX 4
Dié mooi Italiaanse paar is wat die bemarkingsmense “approach”skoene noem. Dit kombineer die eienskappe van stapstewels en rotsklimskoene. Jy sal sien dat die kante van die skoene en die toon goed beskerm is – dis sodat jy kan rotse klim. Die buitesool is topgehalte Vibramrubber en ontwerp om vastrap te verbeter as jy heuwels aanpak. Ondanks die robuustheid is dié skoene lig.
R3 295 by mountain mailorder.co.za (beskikbaar vir mans en vroue) >
“Ek soek gemak en goeie vastrap as ek ’n dagstap doen. Sportskoene is gewoonlik goed genoeg vir ’n halfdagstap teen Platteklipravyn, maar vir voldagstappe is stewiger skoene soos veldloopnommers en stapstewels beter. Dit sal jou voete beter beskerm, en dis veral hier teen laatmiddag dat ’n mens se enkels goeie ondersteuning nodig het.
“Ek koop stewels soos ander mense petrol koop: Ek het geen voorkeure nie, en koop wat ook al die beste kopie is. Een paar hou enigiets van ses weke tot drie maande; eenkeer het ’n paar ses maande lank gehou. Alles hang van die sool af – koop die goedkoopste paar met die beste sool, en dis Vibram.
“Ek het al skoene probeer wat laer gesny is, maar vir my bly stewels die beste. Ondersteuning is veral belangrik as jy swaar dra.
“Wag vir ’n uitverkoping. Hou minstens R1 000 byderhand as jy gemak soek. Pas verskillende skoene met dik sokkies aan. Jy moet jou tone kan rondbeweeg, maar nie jou hele voet nie. En dan die belangrikste gebod: Stap die skoene “in” vir ten minste ’n paar weke voor ’n groot staptog.”