Vlermuise en ouvroustories
Vlermuise is waarskynlik die diere waaroor die meeste kwaad gestook word. Die meeste mense kyk na hulle met afsku en selfs vrees – asof elkeen ’n klein Dracula is. Die waarheid is dat geen Afrika-vlermuisspesie bloed drink nie; hulle navigasiestelsel is heeltemal te goed ontwikkel om in jou hare vas te vlieg; en hulle dra ook nie eens enige parasiete aan mense oor nie. Al dié mites is gegrond op oningeligte ouvroustories.
Dié diertjies speel wel ’n yslike rol in die natuur. Daar is baie verskillende soorte vlermuise – ’n geskatte 1 200 spesies. Vlermuiskolonies kan tot tienduisend sterk wees. Vra jou dus af: Watter uitwerking het so ’n kolonie wat malaria-muskiete en ander insekte – soos dié wat oeste verwoes – vang?
Die kleinste vlermuisspesie is die hommelby-vlermuis van Thailand – hulle is net sowat 3 cm lank en weeg slegs 2 g! Daarenteen het die gouekroon-vrugtevlermuis van die Filippyne ’n vlerkspan van tot 1,7 m.
Sowat 70% van vlermuise is insekvretend, maar party, soos die witkolvrugtevlermuis op die foto, vreet vrugte of nektar. Nektarvretende vlermuise het ’n lang tong en neus wat goed in blomme pas. Só help hulle ook met bestuiwing van onder meer piesang- en mangobome.
Vlermuise is nagdiere en word dus min deur mense gesien. Daarom weet min mense van die ryk verskeidenheid vlermuisspesies wat ’n mens kry en hulle het’n swak begrip van dié diere se gedrag. Trouens, dis waarskynlik een van die moeilikste diere om uit te ken – dis vir my bykans onmoontlik om te doen, selfs al hou ek een in my hand vas.
Hulle is die enigste soogdier wat kan vlieg, en die vlerke bestaan uit verlengde vingers waartussen ’n dubbele membraan strek. Dié vlerke is baie delikate organe – dis hoekom hulle nesmaak op veilige plekke soos rotskrake, weg van enige elemente wat hulle vlerke kan beskadig.
Mensgemaakte strukture soos dakke is uitstekende kunsmatige “grotte” wat dan in morsige en raserige plekke ontaard as vlermuise daar nesmaak. Moet egter nie gifstowwe gebruik om van vlermuise ontslae te raak nie – dit het ’n groot ekologiese impak. Sit eerder ’n bietjie tyd opsy om al die gate waardeur vlermuise toegang kry tot (byvoorbeeld) ’n dak toe te stop.