MAAK REG VIR DIE WINTER
Om in die winter te kamp is heerlik. Dis die ideale tyd om plekke te verken wat in die somer té warm is. Mik na die uitgestrekte vlaktes van Namibië, die Kalahari, of die Karoo, waar die dae sonnig is en die aande koud en helder – net reg om jou te verkyk aan die Melkweg wat bo julle blink, voor julle snoesig om die kampvuur sit en julle hande by die vlamme warm maak.
Nog ’n uitstekende winterbestemming is die wildreservate van die Bosweld, soos Madikwe of die Krugerwildtuin. Die plantegroei is yler in die winter en julle sal die diere dus makliker raaksien. Min dinge bring jou nader aan die brute krag van die natuur as om in jou tent te lê en luister hoe ’n leeu brul.
As jy ’n stapper is, mik Drakensberg toe en slaan jou tent op naby ’n kabbelende bergstroompie. Rol jou matras en slaapsak oop en haal die reiskussing uit: Dis tyd om jou nessie vir die nag te bou... Niks kom by dié gevoel nie – in die wildernis, in jou eie tentjie voel jy soos ’n ontdekkingsreisiger. Met die regte, goeie toerusting sal jy skaars die byt in die lug voel as die son agter ’n hoë rand verdwyn.
Maak jou kos op ’n gasstofie of pak ’n vuurtjie as julle braai. ’n Paar malvalekkers en warmsjokolade later kan jy bed se kant toe staan – jou gemaklike tent en snoesige slaapsak wag. Lees ’n bietjie by koplig totdat jou ooglede swaar begin word en jy wegdryf tot in droomland.
Wie weet, as jy môreoggend by jou tent uit loer, is daar dalk sneeu op die berge!