VIR VEELDAGSTAPPE
’n Swaar rugsak, tegniese terrein, lang ure op jou voete – hiervoor het jy beslis stewels nodig.
1 Hi-Tec Altitude V Ultra
’n Artikel oor stapskoene is nie volledig sonder om hierdie staatmakers te noem nie. Dis ’n gewilde skoen onder stappers. Die boonste leerdeel sal nooit uit die mode raak nie, en ook nie die ontwerp nie.
Die nuutste Ultra-weergawe is waterbestand, met ’n OrthoLitebinnesool wat gemaak is van slow recovery foam: dit beteken die skoen behou jou voetvorm vir langer (lees: gemaklik). Daarby het dit ’n taai rubberbuitesool.
Hiervoor betaal jy nie ’n plaas se prys nie. Dis nie die ligste stewels wat jy al teëgekom het nie en hulle kan warm raak in die somer, maar hulle hou Suid-Afrikaners al jare lank gelukkig.
Vanaf R1 700 by hi-tec.co.za (beskikbaar vir mans en vroue)
2 K-Way Kilimanjaro 16
Dié stewel is die meer geharde neef van die Hi-Tec Altitude, en spesifiek ontwerp om Afrika se hoogste berg te klim. Net soos die Altitude het dit ’n boonste deel van leer en ’n OrthoLite-binnesool, maar dis hoër gesny vir beter enkelondersteuning en ’n Vibramsool vir duursaamheid en goeie vastrap. Die Altitude het ’n nylonskag en die Kili het ’n staalskag vir ekstra stabiliteit. Hulle is ook waterbestand.
R2 000 by Cape Union Mart (beskikbaar vir mans en vroue)
3 Hi-Tec Trail Ox Winter 200
Is jy een van daai waaghalsiges wat die Drakensberg Grand Traverse in die winter aanpak? Of dalk gaan jy in die Alpe ski en sommer ook ’n bietjie in die berg rondstap? Dalk is jou bloed reptielkoud en sterrekyk in Sutherland is ’n uitdaging.
Kry dan Hi-Tec se winterstewel: die Trail Ox. Met die hooggesnyde enkel, die goeie beskerming, waterbestandheid en Thinsulate-voering sal jou voete voel asof hulle in ’n sagte bersie gedraai is. Die buitesool is Michelin-rubber (wat waarskynlik so goed is soos Vibram) en die tong het insetsels om te keer dat vuiligheid inkom.
R2 200 by hi-tec.co.za (beskikbaar net vir mans)
4 Salomon X Ultra 3 Mid GTX Boot
Tradisionele leerstapstewels is gewoonlik vir veeldagstaptogte, maar dié nommers het ’n lojale aanhang. Dit vat gewoonlik gou om hulle in te stap, en hulle is effe ligter en sommige mense beweer dit voel stewiger. Dis te danke aan Salomon se veldlooptradisie: As jy vinnig beweeg, moet jou voete beskerm wees en jy moet ook die terrein onder jou voete voel om jou stapstyl aan te pas.
Die buitesool is Salomon se Contagrip – dit beteken die sool bevat verskillende soorte rubber op verskillende dele en die boonste deel het ’n Gore-Tex-voering om deur strome te waad.
R3 000 by Cape Union Mart (geskik vir mans en vroue)
"Ek is al op my tweede paar Hi-Tec Altitude-leerstapstewels – hulle is regte werkesels. Ek het verlede jaar die Naukluft-staproete in Namibië gaan stap, en afgesien van die ruwe terrein in die algemeen, het ons ook gereeld oor geërodeerde rotsbanke gestap waar wind en water lemmetjieskerp riffels in die klip agtergelaat het. Ek was toe veral dankbaar vir my stewels se harde, dik rubbersole! Die stewel se hoë kraag gee ordentlike ondersteuning vir die skeeftrapslag en het my al (glo ek!) teen menige verswikte enkel beskerm.
"My huidige paar is seker al ’n goeie vyf jaar in gebruik, en daarom is die leer veral oor die toon al afgeskaaf. Dit het sekerlik ’n impak op die stewels se waterdigtheid, maar ek behandel hulle voor elke groot staptog met Storm se waterwerende sproei – vir wat dit werd is. Tot dusver het my voete en sokkies nog altyd op staproetes deur nat gras of ligte motreën binne-in die stewels droog gebly.
"Ek glo in goeie voetvoorsorg en smeer soggens my voete met ’n leksel Vaseline in voordat ek eers ’n dun sykous en dan ’n dik wolsokkie aantrek. Deur die loop van die dag sal ek my voete nog ’n keer of twee só versorg.
"Op die Naukluft het ek wel agtergekom dat die stewels nou begin “hard” loop, maar dis hoog tyd dat ek ’n slag die binnesole vervang. Daarna sal hulle sweerlik nóg vyf jaar hou!"