Skaam jou, Kaapse Natuurbewaring!
Ons het onlangs die vyf dae lange Walvisroete (55 km) in die De Hoopnatuurreservaat naby Bredasdorp gestap. Die natuurskoon het ons elke dag verras – dis duidelik waarom dit een van Suid-Afrika se vlagskiproetes is. Ongelukkig is die geriewe nie op peil nie – kyk net na die foto’s. Ons is op die laaste dag by die kantoor afgelaai, waar ‘n personeellid ons uitgevra het oor ons ervaring van die roete. Sy vra waarskynlik elke dag dieselfde vraag, hoor dieselfde klagtes en gee dieselfde antwoord: “Die bestuur is bewus van die probleme.”
Ons dring aan om met Skhumuzo Tembe, wat onlangs aangestel is as reservaatbestuurder, te praat. Hy erken dat die onderhoudspan nie die nodige kundigheid het nie. Hy weet hulle doen halwe werk.
Hulle beplan glo R10 miljoen se onderhoud en gaan die roete vir vier maande toemaak vir opknapwerk. Dit hoef glad nie so baie te kos nie en ’n maand sal genoeg wees, as mense aangestel word wat weet wat hulle doen. Stappers verwag skoon matrasse, warmwaterstorte, deure wat kan toemaak, heel vensters, skoon strande, netjiese stappaadjies en ’n mens wil sien dat iets gedoen word aan die uitheemse plante.
Die traak-my-nie-agtige houding teenoor stappers, wat R2 300 p.p. betaal, is skandalig.
HILLDIDGE BEER, Somerset-Wes
Marietjie Engelbrecht, kommunikasiebestuurder by Kaapse Natuurbewaring, antwoord: Kaapse Natuurbewaring werk hard om die stapervaring en die onderhoud op die Walvisroete te verbeter. Sowat 3 000 stappers stap elke jaar die roete en dis gewoonlik ’n jaar vooruit bespreek.
Ons gaan die roete twee keer sluit vir opknapwerk: in Junie 2018 vir noodherstelwerk en van Januarie tot Mei 2019 vir uitgebreide opknapwerk. Ons het ook aksieplanne in werking gestel om die werknemers en kontrakteurs te ondersteun in die daaglikse skoonmaak en onderhoud van die roete. Ons is daartoe verbind om dié roete te herstel tot die puik produk wat dit altyd was.