STERREWEG
As daar nou een Vrydagaand dié jaar is om tuis te bly, is dit Vrydag 27 Julie. Trek jou kampstoel nader en verkyk jou aan ’n algehele maansverduistering. Ná ’n lang droogte waar ons nie goeie maansverduisterings uit SuidAfrika kon sien nie, vergoed dié een hiervoor.
Onthou: ’n Maansverduistering gebeur wanneer die Maan deur die Aarde se skaduwee beweeg. Dit is slegs met volmaan wanneer die Son, Aarde en Maan in ’n presiese ry staan en dit moontlik maak.
Die Julie-verduistering gebeur op ’n Vrydagaand, op ’n heel gerieflike tyd. Die sigbare deel van die verduistering begin net voor halfnege (8.24 nm.; sien tabel) en eindig ná middernag. Die maksimumverduistering is om 10.22 nm. – ’n skaflike tyd vir ’n Vrydagaand om gou uit te glip en te gaan kyk.
Die algehele verduisteringsfase duur van 9.30 nm. tot 11.13 nm., waartydens die Maan ’n donker koperkleur sal vertoon. Presies hoe donker en hoe rooi die Maan word, verskil van verduistering tot verduistering. Dit hang af van hoeveel stof en onsuiwerhede in die atmosfeer is tydens die verduistering. Dié goed absorbeer die sonlig en laat slegs die rooi lig deur – dis soortgelyk aan wat met ’n sonsopkoms en -ondergang gebeur. Vulkaniese uitbarstings speel ’n groot rol. Ná groot uitbarstings is verduisterings gewoonlik besonder donker.