BIYAMITI-BOSVELDKAMP
Die Biyamiti-bosveldkamp is soos daai uitskieter op hoërskool wat goed was in alles: Rugby, krieket, atletiek, skaak én bolplante verkoop... Daar is soveel dinge wat in dié bosveldkamp se guns tel, dis g’n wonder dis byna heeljaar volbespreek nie.
“Volgens die statistiek van April laasjaar af was die kamp 98% vol; dis die naashoogste syfer in Sanparke,” vertel Surprise Hlatshwayo, wat sedert 2017 die gasvryheidsbestuurder is.
Wat maak dié bosveldkamp so gewild? Dis die enigste een met ’n stuk private pad (18 km) waar jy die Groot Vyf kan sien én ’n uitkykpunt waar jy kan uitklim en vroegoggend warm fleskoffie kan drink terwyl die kwêvoëls en blouapies in die takke baljaar.
Verder is die bosveldkamp naby aan die Krokodilbrugen Malelanehek, en dus die N4-snelweg. Besoekers kan die oggend ’n wildrit doen of by die Biyamitikeerwal gaan sit en betyds by die O.R. Tambo- of Lanseria-lughawe wees. Dit lê ook rofweg in die middel van Krokodilbrug-, Onder-Sabie-, Skukuza- en Berg-en-Dal-ruskamp; dus kan jy elke dag ’n ander rigting inslaan op soek na diere.
Biyamiti is in ’n uitstekende wildkykgebied. “Jy kan sommer die Groot Vyf van jou stoep af sien,” vertel Surprise. Die bosveldkamp is juis so ’n lekker plek. Dis langs ’n droë rivierbedding en 9 van die 15 huisies het ’n uitsig. Met ons besoek het renosters, olifante en waterbokke in die droë rivierloop gewei terwyl bosbokkies in die kamp rondloop. Van die bruinkopvisvangers was so mak, ek kon telkens tot binne ’n meter van een af kom.
As al dié dinge vir jou lekker klink, gaan nou na Sanparke se webruimte en bespreek ’n naweek of ’n paar dae vir volgende jaar, want vanjaar is waarskynlik al volbespreek. Hoe lyk die geriewe? Hier is kothuise met ’n oopplankombuise (slaapplek vir 2) en groter gastekothuise (slaapplek vir 5). Hier is alles wat jy nodig het, maar moenie enigiets fênsie te wagte wees nie. Die liggroen badkamers dateer uit die dae toe Sanparke se logo nog “Custos Naturae” was en in ons huis was die stortgordyne met kabelstroppe vasgemaak. Die handdoeke het ook muwwerig geruik. Wat pla? Die blouapies hier is van ’n ander kaliber – hulle toon byna geen vrees nie. Iemand in julle geselskap sal deurentyd op aapdiens moet wees, anders gaan julle iets kwyt wees. Koste Vanaf R1 488 p.n. vir 2 mense, slaapplek vir 4 mense (R434 per ekstra persoon, R217 per ekstra kind) Kontak 013 735 6171 (ontvangs)