SHIMUWINI-BOSVELDKAMP
Shimuwini is kop aan kop met die Biyamiti-bosveldkamp. Gaste het ook ’n stuk private pad (S141) van ongeveer 15 km met verskeie afdraaipaadjies na die Letabarivier (en ’n groot kremetartboom). En hier’s die troefkaart: Dis die enigste bosveldkamp met ’n swembad – ’n moet as jy in die somermaande in die wildtuin vakansie hou. Shimuwini is egter in die mopaniebosveldstreek wat nou nie die smaaklikste weiveld vir diere is nie...
“Maar hier ís baie diere,” sê die gasvryheidsbestuurder Christo Knox, wat reeds ses jaar hier werk. “Jy moet net harder werk om hulle te sien omdat die mopanies so ruig is. Ek sien gereeld leeus as ek Phalaborwa toe ry. Op die S141 na die teerpad toe gaan jy waterbokke en seekoeie langs die rivier kry. En jou kanse is goed om buffels en kameelperde te sien. Ry net stadig.
“Maar die lekker ding van Shimiwuni is dat jy nie rond hoef te ry nie,” sê Christo. Die bosveldkamp se 15 huisies lê langs mekaar op ’n groot groen grasperk op die oewer van die Letabarivier. Bankies staan versprei onder jakkalsbessie-, appelblaar-, rooiessenhout- en mopaniebome.
“In Desember het ’n leeutrop al langs die oewer gestap totdat dit donker word. En ’n luiperd het helder oordag ’n bok gevang in daardie bos. Mense het een oggend vroeg, so vieruur se kant, by die voëlskuiling gesit toe loop ‘n luiperd reg voor hulle verby!” vertel hy opgewonde.
Ons pak af en maak ons stoepstoele so staan dat ons rivier se kant toe kyk. ’n Reusereier kom land swierig op ’n eilandjie in die rivier. ’n Seekoei nurk verontwaardig – dit lyk of hy nie gesteur wil wees nie.
Ná ’n middagslapie en afkoel in die swembad stap ons al langs die draad tot by die voëlskuiling. Die son begin groet en ’n pienk gloed kom lê op die water. ’n Paar swartreiers skud hulle vere vir oulaas reg voordat hulle vir die nag in ’n ry in die rivierbedding gaan staan.
Christo het my vroeër die dag aangeraai dat hoewel ’n mens baie rigtings van Shimuwini af kan inslaan, jy eerder jou kans moet gebruik om te rus. “Sit heeldag op die stoep. Daar is min plekke in die wildtuin waar jou chalet so naby aan die water is.”
Voor slaaptyd skyn ek vir oulaas my koplamp se lig oor die grasperk en water. Hoe lyk die geriewe? Hier is kothuise (slaapplek vir 4) en gastekothuise (slaapplek vir 5 of 6). Die huisie het ’n bietjie aandag gekort – die gordyne sit hoogwater en die kassies is lendelam. Maar hier is wel vismesse en soplepels vir ’n driegangmaaltyd. As die soort goed jou erg pla, bespreek no. 9. Die huis het afgebrand en is nuut oorgedoen. No. 1 en 15 is gewild, want albei is lekker privaat. No. 1 het nie ’n wye uitsig op die rivier nie, maar wel ’n bosuitsig. Wat pla? ’n Vliegroete loop bo-oor die bosveldkamp; dus hoor jy nou en dan ’n vliegtuig verby dreun. Koste Vanaf R1 433 p.n. vir 2 mense, slaapplek vir 4 mense (R434 per ekstra persoon, R217 per ekstra kind). Kontak 013 735 6683 (ontvangs)