BATELEUR-BOSVELDKAMP
In dié bosveldkamp met net sewe huisies (die ander bosveldkampe het 15 huise) voel dit asof jy jou eie bosveldplasie het. Buite seisoen kan dae verbygaan waar die vriendelike Lolly Nyundu, die gasvryheidsbestuurder, of Cecilia Phophi, die diensbestuurder, die enigste mense is wat jy teëkom. Met ons besoek in Maart was daar net vier ander besoekers in die kamp. Selfs al is die bosveldkamp volbespreek, is hier net 34 gaste – dis omtrent hoeveel kinders daar in ’n klaskamer is!
“Sodra jy hier inry, hou jou selfoon op met werk,” sê Lolly. “Ons lewe in ’n besige wêreld. Ons is altyd haastig op pad iewers heen. Bateleur is stil en rustig. En die voëllewe is uitstekend.”
Inderdaad, toe ek by ontvangs uitstap, vertel my man hoe ’n oostelike rooipootvalkie ’n vis probeer vang het in die visdam buite die deur. Hou ook die bome dop vir neushoringvoëls, swartkopwielewale en spookvoëls.
Die huise staan versprei langs die droë rivierbedding, maar weens die digte plantegroei het hulle nie juis mooi uitsigte nie. Elke huisie is versteek in sy eie stukkie bos in die boomryke kamp – jy sien net hier en daar ’n stoepmuurtjie of venster tussen die takke deur. Dit laat ’n mens dink aan die gemmerbroodhuisie waarop Hansie en Grietjie afgekom het.
As jy die “my-eie-stuk-bosveld-gevoel” na die volgende vlak wil vat, ry een oggend na die Tshangauitkykpunt sowat 5 km van die kamp af. Die kanse is goed julle sal hier ook alleen wees. Shingwedzi is die naaste ruskamp en dis nog sowat 40 km se ry soontoe.
Kry jou sit op een van die groot rotsblokke en kyk hoe die son opkom oor die draai wat die Tshangarivier maak deur die oneindige Bosveldlandskap rondom jou.
Eers is dit stil, maar dan begin die gewone oggendtrawante van hulle hoor: kwêvoëls, spookvoëls, gewone vleiloeries... En nog ’n dag breek aan in die Kruger. Hoe lyk die geriewe? Die gastekothuise (slaapplek vir 4 of 6) is in ’n goeie toestand. Die beddegoed, gordyne en meubels is modern. Die bosveldkamp is die enigste een met lugreëling (die ander bosveldkampe het dakwaaiers) en TV’s met beperkte DStv. Die kamp is netjies – hier’s nie ’n grassie uit plek nie, die paadjies is netjies met ronde klippe uitgelê. No. 1 is gewild – dis privaat en het ’n eie paadjie na die skuiling toe. Wat pla? Die gedreun van die lugreëling kan steurend wees. En moenie verbaas wees as jy ’n boomeekhoring in jou huis kry nie – hulle sal wel uiteindelik uitklim waar hulle ingekom het. Koste Vanaf R2 381 p.n. vir 4 mense. Kontak 013 735 6843 (ontvangs)