’n Luilekker Sondag in die winter

Min dinge is meer heilsaam as ’n Sondagete wat in die oond gerooster is, en menige winterdag smag ’n mens daarna. Natuurlik saam met ’n robuuste, volronde wyn. Hier is ’n paar heerlike voorstelle. Van Loveren in Robertson is bekend vir sy bekostigbare Four Cousins-reeks, maar die handelsmerk het ook ’n ander reeks. Die Rhino Run-reeks samel geld in om renosters teen stropery te beskerm. Probeer die Ian Player 2016 Red Blend (R61) en geniet die sappige swartvruggeure terwyl jy terselfdertyd iets vir die renosters doen.

Met klimaatsveranderinge wat wêreldwyd ’n al groter werklikheid word, gebruik wynmakers al meer druifvariëteite wat in warmer dele van die wêreld groei. Een van die opsies is ’n witdruifvariëteit genaamd Verdelho wat met sukses in Portugal gekweek word. Die organiese Org du Rac Verdelho 2017 (R80) is ’n uitstekende voorbeeld van hierdie variëteit – vars en lewendig, maar met genoeg lyf om sy man te staan teen ryk kos. Sit ’n bottel op die tafel saam met varklies of ’n oondhoender.

As jy op soek is na ’n prettige, vrugtige wyn teen ’n goeie prys, stel die Fat Bastard-reeks selde teleur. Die oorspronklike wyne onder dié eiesoortige handelsmerk is in Frankryk gemaak, maar hy het sy werksaamhede uitgebrei en die weergawes op ons winkelrakke word hier in Suid-Afrika gemaak. Hy het pas ’n hoëgehaltewyn bekend gestel – die Fat Bastard Golden Reserve 2017 (R120) – en dis die ideale pasmaat vir ’n winterfees: ryk en ryp, met heelwat warmte.