Namibië roep!
Verken Etosha, Damaraland en die Skedelkus op ’n kampavontuur saam met Bhejane 4x4 Adventures.
Beleef die windverwaaide strande van die Skedelkus, die berge van Damaraland en die oorvloed wild in die Etosha- nasionale park. Ons sorg vir die parktariewe en reëlings – jy kan net ontspan en die reis geniet.
Die toer word deur ’n ervare natuurbewaringskenner en avontuurgids gelei wat te alle tye met jou in radioverbinding is terwyl jy bestuur. Die roete is uitdagend, maar die moeite werd en ons het al die nodige toerusting en kennis as daar enige probleme is. Ons span boskokke sorg drie keer per dag vir watertand-etes.
Hier is wat jy kan verwag.
DAG 1 Die groep ontmoet by Alte Brücke in Swakopmund. Langs die kampvuur dié aand gee die toerleier jou ’n idee van wat op julle wag.
DAG 2 Verken Swakopmund. Hier is heelwat aktiwiteite –quadfietsry in die woestyn en toere waarop jy die ongelooflike diertjies sien wat in duine bly. (Bykomende aktiwiteite is vir jou eie sak.) Ons kamp langs die kus; aandete is dus vars vis.
DAG 3 Ry na Brandberg via Seal Point (piekniekmiddagete) en die Dorob- nasionale park, al langs paaie gebou uit gips en soutwater. By die oornagkampplek sal die potte op die vuur prut.
DAG 4 Gaan ná ontbyt vir ’n begeleide stap op die hange van Brandberg om die bekende White Ladyskildery en ander rotskuns te sien. Ons eet nog ’n piekniekmiddagete en span die middag langs die swembad uit. Laatmiddag mik ons vir ’n koppie hier naby vir ’n skemerkelkie. DAG 5 Ons groet Brandberg en ry noord na Twyfelfontein verby ’n paar vreemde rotsformasies en oer oue welwitschia-plante. Twyfelfontein is ’n Wêrelderfenisgebied, bekend vir sy oorvloed mooi rotsgraverings. Ons ry verder tot by Palmwag verby ongelooflike landskappe, tot by ons kampplek waar jou tent reeds vir jou staan en wag.
DAG 6 Verken die Huab- en Uniabrivier op soek na woestynolifante en swartrenosters. Herlaai jou batterye by die kamp.
DAG 7 Ons ry wes na Torrabaai langs die Skedelkus, met sy warrelende mis en verlate strande. Ons stap tot by die Uniabwaterval en eet middagete op die strand en mik dan weer ooswaarts, terug na Palmwag.
DAG 8 Ons verlaat Palmwag en mik na Outjo vir brandstof en inkopies by die supermark met goeie voorraad. Etosha-tyd! Wanneer jy daar aankom, sal jou tent reeds staan en daar behoort tyd te wees vir ’n middagwildrit gevolg deur aandete en ’n sopie by die kamp se watergat met spreiligte.
DAG 9, 10 &11 Dit hang van jou af – ry in die park rond op soek na wild of hou by ’n watergat stil en wag vir die diere om na jou toe te kom. Sit agteroor en geniet jou tyd in die kamp waar ons jou lewe so gerieflik moontlik gaan maak. Jou gids is altyd beskikbaar met raad en die kosspan sal enige tyd vir jou middagete inpak as jy verder wil ry.
DAG 12 Tyd om op te pak en te groet... Tot volgende keer!