WEET VOOR JY WAAI
Winkels? Die Kruger-bosveldkampe het nie restaurante of winkels nie. Jy kan wel hout, ys, gebottelde water en vuuraanstekers by ontvangs koop.
Geriewe ’n Kothuis het een slaapkamer met ’n badkamer, en soms ’n slaapbank in die sitkamer. ’n Gastekothuis het meer as een kamer en minstens twee badkamers. Die toestand van die huisies wissel van huis tot huis en van bosveldkamp tot bosveldkamp. Sommige lyk 27 jaar oud terwyl ander opgeknap is met moderne meubels en dekordinge – al die boskampe is in 1991 gebou. Hoe ook al, daar is alles wat jy nodig het. Al die huisies het elektrisiteit (Eskom- of sonkrag), ’n kuierstoep en braaiplek. Onthou net, jy’s nie hier vir die geriewe nie – jy’s hier vir die vier renosters wat in die rivierbedding wei.
Nommer een, asseblief. Jy kan ’n spesifieke eenheid – byvoorbeeld no.15 langs die draad of no. 3 by die skuiling – aanvra deur die bosveldkamp direk te kontak. Hulle sal jou sover moontlik akkommodeer.
Wat kan ek nog doen? Die boskampe bied wildritte vanaf R328 p.p. aan. Jy kan slegs by Biyamiti op ’n begeleide oggendstap gaan teen R540 p.p.
Watter voertuig? Al die bosveldkampe is bereikbaar met ’n gewone sedan.
Koste Bewaringstarief vir dagbesoekers: R83 p.p. en R42 per kind. Gratis as jy ’n Wild Card het. Hou in gedagte dat alle pryse op 1 November styg.
Kontak 012 428 9111; sanparks.org