Sit aan, vleistande!
Die geur van vleis wat stadig in die oond rooster, laat ’n wintersaand knus voel. Hier is ses van my gunstelinge om die koue te verdryf.
Hoender in rooiwyn
Vir 6 Voorbereityd 15 minute Gaarmaaktyd 90 minute Hierdie hoender word heel gebak en is sappig en geurig.
Jy benodig
• 1 eetlepel olyfolie • 1 ui, gekap • 4 knoffelhuisies,
fyngekap • 1 eetlepel balsemiekasyn • 10 tiemietakkies • 3 ansjovisfilette • 1 eetlepel tamatiepasta • 2 teelepels vanielje-ekstrak • 1 teelepel paprika • 1 koppie rooiwyn • 1 blik (410 g) gekapte tamatie • 125 g chorizo of salami,
in skyfies gesny • 1 eetlepel growwesout • gemaalde swartpeper na smaak • 1 heel hoender
Só maak jy
1 Voorverhit die oond tot 200 ºC. Verhit die olyfolie in ’n platboompot en braai die ui daarin tot sag en geurig.
2 Roer al die ander bestanddele behalwe die hoender by die ui en laat dit vir 20 minute prut om ’n sous te maak.
3 Sit die hoender in die sous, sit die deksel op en stuur hom oond toe. Haal die pot ná 1 uur uit en laat dit – steeds met die deksel op – vir 20 minute eenkant staan. Die hoender is mooi deurgaar wanneer ’n boudjie maklik loskom as jy daaraan trek.
Gebakte varklies met balsemiekasyn
Vir 6 Voorbereityd 10 minute Gaarmaaktyd 2 uur Die balsemiekasyn vorm ’n lekker taai sous met ’n ryk smaak.
Jy benodig
• 1 koppie bruinsuiker • 1 koppie hoenderaftreksel • ½ koppie balsemiekasyn • 1 kg varklies, vel verwyder • 2 knoffelhuisies, gekap • 6 jong rooiuie • 3 vars pruime, ontpit
en middeldeur gesny
Só maak jy
1 Voorverhit die oond tot 160 ºC. Kies ’n oondbak waarin die varklies knus sal pas. Los die suiker in die aftreksel op en skink dit saam met die asyn in ’n oondbak.
2 Voeg die vleis, knoffel en uie by, sit foelie oor en bak dit vir 1 uur.
3 Verhoog die hitte tot 200 ºC, haal die foelie af en bak dit vir nog 30 minute. Voeg die pruime by en bak dit vir nog 20-30 minute totdat die vleis sag en die sous effens taai is.
Vark in klappermelk
Vir 6 Voorbereityd 10 minute Gaarmaaktyd 3 uur Klappermelk is ’n natuurlike pasmaat vir varkvleis en die tequila gee hier ’n ekstra geur. Jy kan dit egter weglaat indien jy nie ’n knertsie byderhand het nie.
Jy benodig
• 2 eetlepels olyfolie • 1 kg varklendestuk • 1 eetlepel growwesout • gemaalde swartpeper na smaak • 4 uie, in dun skyfies gesny • 2 knoffelhuisies, fyngekap • ¼ koppie tequila • 1 blik (410 g) klappermelk • sap en gerasperde skil van 1 lemoen • vars koljander om voor te sit
Só maak jy
1 Voorverhit die oond tot 160 ºC. Verhit die olyfolie in ’n platboompot, geur die vleis met sout en peper na smaak en verbruin dit saam met die ui. Gooi enige oortollige olie af.
2 Voeg die knoffel, tequila, klapper- melk en die lemoensap en -skil by die pot.
3 Sit die pot met ’n styfpassende deksel in die oond en bak dit vir drie uur totdat die vleis sag is en van die been af loskom.
4 Vlok die vleis in repies, roer dit goed deur die sous en sit dit met vars koljander voor.
Lamskenkels met brandewynrosyne
Vir 4 Voorbereityd 20 minute Gaarmaaktyd 2 uur Hiérdie lamskenkels is nou ’n spesiale bederf! Sit dit voor met platbrode en suurroom en kyk hoe lekker jou mense smul.
Jy benodig
• 700 g lamskenkels (sowat 3) • 2 eetlepels paprika • ½ teelepel fyn komyn • sap en gerasperde skil van ½ suurlemoen • 4 knoffelhuisies, fyngekap • 1 eetlepel rissiesous • 1 ui, gekap • 3 takkies vars origanum • 2 koppies lamsaftreksel • ’n hand vol rosyne • ¼ koppie brandewyn • ’n hand vol groenolywe • ’n hand vol gekapte koljander
of pietersielie
Só maak jy
1 Voorverhit die oond tot 180 ºC. Vryf die lamskenkels in met die paprika, komyn, suurlemoensap en -skil, knoffel en rissiesous. Laat dit in die yskas marineer – verkieslik oornag.
2 Braai die vleis in ’n swaarboompot tot mooi goudbruin. Gooi dan die gekapte ui daarby en braai dit tot geurig.
3 Voeg die vars origanum en lamsaftreksel by, verhit dit tot kookpunt, sit die deksel op en bak dit vir nog twee uur.
4 Maak intussen die brandewynrosyne só: Gooi die rosyne in die
brandewyn en verhit dit vir ’n paar minute in die mikrogolfoond (of in ’n potjie oor die vuur). Laat dit dan staan om af te koel.
5 Wanneer die lam sag is en van die been af loskom, kan jy die olywe en gekapte kruie byvoeg. Proe en geur die pot na smaak met sout, nog suurlemoensap of rissie.
Beesborsstuk in melk
Vir 6 Voorbereityd 10 minute Gaarmaaktyd 4 uur Dit klink dalk aardig om ’n borsstuk in melk te kook, maar glo my – die resultaat is doeksagte beesvleis.
Jy benodig
• 1 kg beesborsstuk ( brisket) • 4 teelepels growwesout • gemaalde swartpeper • 2 eetlepels botter • 2 uie, in kwarte gesny • 3 knoffelhuisies, fyngekap • 3 koppies melk • 1 koppie beesvleisaftreksel • 2 lourierblare • 500 g jong patats, middeldeur
gesny • ’n hand vol pietersielie, gekap
Só maak jy
1 Voorverhit die oond tot 160 ºC. Geur die vleis met sout en swartpeper en braai dit in ’n groot platboompot tot dit oraloor mooi goudbruin is.
2 Voeg die botter, ui en knoffel by die pot en skink die melk en aftreksel rondom die vleis. Voeg die lourierblare by, sit ’n styfpassende deksel op en bak dit vir drie uur of tot die vleis sag is.
3 Skep die borsstuk uit en gee die sous ’n deeglike roer – dit sal bruin en brokkerig wees. Pak die patats daarin, sit die vleis bo-op en sit dit terug in die oond.
4 Verhit die oond tot 180 ºC en bak dit tot die patats sag is. Sny die vleis in stukke, skep dit terug in die pot en garneer dit met pietersielie. >