AGTER DIE SKERMS

Vir dié maand se Ses van die Bestes-artikel het Zigi Ekron ’n draai gery al langs die Suidkus van KwaZulu-Natal (bl. 110). Daar ontmoet hy onder andere township- surfers en ’n donkie wat Coke drink.

Dis 'n lang pad van die Kaap af na KwaZulu-Natal se Suidkus (sowat 1 500 km!), maar wie hou nie van 'n lang road trip nie? Ek't binneland langs deur die Karoo en Oos-Kaap gery. Dis ongelooflik om te sien hoe die landskap om jou stelselmatig verander. Die klipperige rantjies word mettertyd grasvelde en mielielande voordat die subtropiese heldergroen oorneem. Geen langpadreis is volmaak sonder 'n burger en 'n koffie by 'n Wimpy nie, en die een op Kokstad het nogal beïndruk.

Ek is in die Kaap gebore en getoë. Seevakansies was dus nie juis 'n prioriteit nie. Ons het eerder na my oupa se plaas in die Oos-Kaapse Drakensberg toe gegaan.

Wanneer ek dus nou na KwaZulu-Natal se Suidkus gaan, verstaan ek hoe mense van die binneland oor seevakansies voel. Oral waar jy gaan – binne of buite seisoentyd – voel dit soos vakansie: Straatverkopers smous met aandenkings, daar's padstalle met vrugte, en strande met warm water...

Trafalgarstrand naby Southbroom was een van my gunstelingkolle. Ek't eendag 'n paar seuns van Bhokodisa in die Gcilima-township (foto) daar raakge-loop. Hulle stap 11 km met hulle branderplanke om te kom surf. Hulle draai alles wat jy oor surfers gedink het op sy kop. Hierdie is nie cool dudes met Oakley-donkerbrille nie. Hulle behoort tot klubs soos die Trafalgar Saints en Wave of Hope, en voor hulle die branders invaar, maak hulle eers 'n kringetjie om te bid vir beskerming en dankie te sê vir die see.

En dan was daar die Pistols Saloon op Ramsgate. Dis 'n lekker kuierplek, maar wanneer Donkey – 'n donkie, ja – instap, raak dit dadelik nog joliger.

Dis plekke soos dié wat jou wys watter wonderlike land Suid-Afrika is.