VIR HARDEBAARDREISIGERS
1 ET, IS DIT JY?
Gaan ek regtig ’n satellietfoon nodig kry? Dalk nie, maar as jy dit nodig kry, gaan jy baie dankbaar wees jy het een. Slimfone “praat” met selfoontorings, wat so skaars soos hoendertande is in sekere streke in Afrika. Daarteenoor praat satellietfone met ’n satelliet, dus het hulle oral in die wêreld dekking.
Kyk na die gebied waarheen jy reis. As jy nie seker is dat jy minstens een ander voertuig per dag gaan teëkom nie, het jy ’n satellietfoon nodig.
Hoe duur is dit min of meer? Begroot op sowat R10 000 vir ’n satellietfoon met basiese eenhede (50 eenhede wat 30 dae geldig is). Daarna gaan jy sowat R1 000 betaal vir 50 eenhede (30 dae geldig). Jy kan ook een huur – dit kos sowat R2 000 vir twee weke.
WENWENK
As julle in ’n konvooi reis, is een satellietfoon genoeg. Deel die koste. Zippisat beantwoord al jou vrae: 072 767 6578 of
zippisat.com.
2 HILUX 1, DIT IS HILUX 2...
As jy dink ’n walkie-talkie is ’n kinderspeelding, het jy te veel cowboys en kroeks as kind gespeel. Tweerigtingradio’s is ’n meer betroubare kommunikasiemiddel as ’n selfoon as jy in die boendoes in ’n konvooi ry.
WENWENK
As jou radio se kraglewering tussen 0,5 en 5 watt is, moet jy ’n lisensie van die Onafhanklike Kommunikasieowerheid van Suid-Afrika (Okosa) hê. Die kleiner outjies het ’n reikwydte van tot 5 km en mag sonder ’n lisensie gebruik word. Hierdie tweerigtingradio’s gebruik ’n frekwensie van tussen 403 en 470 MHz. Zartek ( zartek. co.za) het ’n wye verskeidenheid tweerigtingradio’s.
3 AG, GAAN VLIEG, MAN
’n Hommeltuig ( drone) is ’n luukse, maar ’n lékker luukse! Hierdie kameras is nie meer naastenby so duur of lomp soos die eerste modelle nie – jy kry nou al modelle wat veldlopers ( trail runners) in hulle rugsakkies saamkarwei. Dis lekker speelgoed waarmee jy die mense by die huis kan laat oee en aaa, en van hulle neem al 4K-video (supergehalte).
WENWENK
Bly uit die moeilikheid uit met ons lys moets en moenies in die kassie hiernaas.