DRAKENSBERG
Jy hoef nie nét te stap as jy in die Drakensberg kuier nie – hier is ons voorstelle vir blyplekke na aan die berg waar jy kan stoepsit, wyd tuur en goed rus
Is jy lus vir ’n naweek van stoepsit en in die verte tuur? Die Drakensberg is sowat 3½ uur se ry van Gauteng of Durban af. Sit ’n verlofdag of twee in en rus in die skaduwee van Suid-Afrika se mooiste bergreeks.
Staan jy op enige punt in die uKhahlamba Drakensbergpark verstaan jy gou waarom sommige mense behep is met hierdie bergreeks – hier is soveel om te ontdek, dit voel asof ’n leeftyd nie lank genoeg is nie! Kyk, nie almal van ons is stappers wat pieke aanpak en in ’n tent of grot oornag nie. Gelukkig is hier talle selfsorgopsies met kaggels en wye stoepe waar jy steeds die Drakensberg se bekoring kan geniet.
Maar wees paraat: Hier is heelwat blyplekke met ’n véraf uitsig op die Drakensberg waarvan die naam te kenne gee dit is sommer om die hoek. Maar in der waarheid is dit ’n spreekwoordelike dagrit te perd ver met ’n gans ánder atmosfeer.
Ons mikpunt was om wegbreekplekke so na as moontlik te soek, as ’t ware ín die berg se skadu en voue. Nou ja toe, pak jou tas (stapstewels is nie verpligtend nie), ’n goeie boek of twee en antwoord die roepstem van die berg. >