FOTOPORTEFEULJE
Kyk hoe lyk Namibië deur die lens van die bekroonde landskapfotograaf Hougaard Malan
amibië se dor landskappe lok fotograwe van reg oor die wêreld – gaan kyk maar op Instagram (#namibialandscapes, #namibiaphotography). Oral waar jy kyk, sien jy hoe geologie “gebeur”: Die eindelose vlaktes van die suide waar rotsgebergtes soos eilande verrys; die oranje duine van die Namib; die woestynriviere van die noorde...
Vir Hougaard Malan is die beste ding van Namibië die min mense. Die land het een van die laagste bevolkingsdigthede ter wêreld – net sowat 3 mense per vierkante kilometer!
Die suide is saans een van die donkerste plekke in die land en ideaal om die naglug af te neem. “Met nuwemaan by Dooievlei kan jy die skaduwee van jou hand sien as jy dit na aan die wit klei-oppervlak hou,” sê Hougaard. “’n Skaduwee geskep deur sterrelig.”
Hougaard erf sy liefde vir die natuur en wilde plekke by sy ouma, sê hy. Toe hy jonk was, het sy vir hom geïllustreerde ensiklopedieë en boeke oor natuurgeskiedenis gegee en hy het totaal weggeraak in die mooi foto’s. Die res is geskiedenis.
Hy het die afgelope dekade een van Suid-Afrika se beste landskapfotograwe geword en hou daarvan om sy passie met ander te deel: As hy nie by die huis op Stellenbosch is nie, lei hy fototoere na bestemmings soos Patagonië (sien Weg #165), die Blyderiviercanyon en die Wildekus.
En, natuurlik, Namibië.