11 LAKE NAVERONE, MZIMKHULURIVIER VALLEI
Die pad wat jou tot by Lake Naverone neem, moet een van die mooiste paaie in die land wees. Dis talle kinkels en kronkels en om elke draai ’n uitsig uit ’n ander hoek oor die berg. Elke nou en dan kruis jy die Mzimkhulurivier, en dan is die bestemming boonop ook ’n hoogtepunt.
Die oord lê uitgestrek met genoeg ruimte tussen die kothuise om privaatheid te verseker. En glo my, jy gaan nie anders kan as om jou Instagram-volgelinge te oorval met foto’s van die weerkaatsing van die berg in die twee groot mere nie.
Die meerderheid kothuise is teenaan die mere, en vlieghengelaars kan van die stoep af lyn natmaak. Geriewe Die kothuise is besonder goed toegerus. Elkeen het ook ’n kano vir eie gebruik. Verder is hier trapbote, ’n speelpark, tennisbane en ’n vliegveld. Bespreek kothuis 9 as Siebie, die worshond, saam reis. Wat beïndruk? Privaatheid en uitsig, al is hier 21 kothuise in die oord. Ook die vriendelikheid van die ontvangspersoneel. Hoe kom ek daar? Neem die R617 uit Underberg. Lake Naverone is 30 km verder op linkerhand. Koste Kothuise met slaapplek vir 2 tot 12 mense: Vanaf R540 tot R680 p.p.p.n. Vra na die spesiale aanbiedings in die middel van die week. Kontak 033 701 1236; lakenaverone.co.za