Gee my ’n kus

In die ou dae was die kuslyn tussen Lüderitz en Walvisbaai die speelplek van slegs vissermanne en 4x4-entoesiaste. Jy kan steeds net met ’n 4x4 daar uitkom, maar deesdae is daar ’n paar operateurs wat toeriste soontoe begelei. ’n Verskeidenheid diere hou in die duine, waaronder gemsbokke, robbe, jakkalse, bruinhiënas en baie kleiner outjies soos die Namibwebpootgeitjie en die Namibduinadder.

Uit die lug kry ’n mens natuurlik ’n beter idee van hoe yslik groot die duinlandskap is.

Hougaard het laasjaar al die pad kuslangs van Swakopmund af suid gevlieg tot by die wrak van die Eduard Bohlen. Hy beveel die dienste van Bateleur Helicopters op Swakop aan: “Hulle is altyd heeltemal bereid om deure af te haal en hulle kliënte te help om die foto’s te neem wat hulle graag wil hê.”

HOE? Nikon D810; 24-70 mm-lens; sluiterspoed 1/2 000ste van ’n sekonde; lensopening f11; ISO 400. >