SUIDELIKE DRAKENSBERG
SFISO THABETHE, toergids Ons verkies om toergroepe Lotheni toe te bring, want dis ’n klein kamp en rustig, met van die beste uitsigte en dagstaproetes in die Drakensberg. Veral die buitelanders hou daarvan dat dit so afgeleë is.
9 LOTHENI, UKHAHLAMBA DRAKENSBERGPARK
Staal jou vir die pad na Lotheni – hetsy jy van die noorde van Nottingham Road se rigting kom, of van die suide van Underberg: Dis rof, en in die reënseisoen sal ’n 4x4voertuig nodig wees.
Die bestemming is egter die moeite werd: Lotheni lê diép in die berg se voue. En natuurlik het al 12 hutte ’n uitsig. Weer eens is daar te kus en te keur uit staproetes, en heelwat daarvan is kruis en dwars oor bergstrome. Geriewe Die beste is die kaggel binne die hutte. Die koelkas, geiser en stoof werk met gas; kragopwekker is aangeskakel van 5 nm.-10 nm. Vriesgeriewe in die gemeenskaplike kombuis. Kampwinkel is oop van 8.30 vm. tot 1 nm. en weer van 2 nm. tot 4.30 nm. Wat beïndruk? Ja-ja, weer eens die stilte, uitsig en wandelroetes. Hoe kom ek daar? Van Nottingham Road af: ry 23,4 km met die Fort Nottinghampad, draai regs by die bruin aanwysingsbord op die Impendlapad en volg dan die borde tot by die reservaat se hek sowat 25 km verder. Van Underberg af: Neem die R617 en volg die aanwysingsborde op die Onder-Lothenipad vir 89 km. Koste Kamp (sonder krag): Vanaf R90 p.p. Chalets: Vanaf R280 p.p., slaapplek vir twee of drie mense. Kothuise: Vanaf R1 440 p.n. vir 6 mense. Simes-kothuis (bring jou eie beddegoed): Vanaf R2 800 p.n. vir 10 mense. ’n Bewaringstarief van R40 per volwassene en R20 per kind per dag is betaalbaar. Kontak 033 845 1000; kznwildlife.com
10 KHOTSO BACKPACKERS, NABY UNDERBERG
Khotso beteken “vrede” in Suid-Sotho, en hier is dinge beslis vredig.
Hier is vier selfsorgeenhede eenkant van die rugsakverblyf, waarvan drie gesellige rondawels is en die vierde ’n ruim houthuis waar Heidi en haar oupa tuis sou voel.
Verken die omgewing te voet van hier af tot doer oor die voetheuwels van die berg. Khotso is ook bekend vir perderitte, ook oorgrens tot in Lesotho (onthou jou paspoort), 4x4-toere oor die Sanipas of ’n daguitstappie na Lesotho.
Die geriewe in die hostel is netjies, maar die rondawels bied beter waarde vir geld. Die kampterrein is goed geleë, maar met ons besoek was die ablusiegeriewe verwaarloos. Geriewe Die rondawels het elk ’n kaggel, toegeruste kombuis met gasstoof, braaigeriewe, houtdek; en die houthuis dieselfde, net op groter skaal! Wat beïndruk? Die plaasatmosfeer, netheid van die rondawels en waarde vir geld. Hoe kom ek daar? Neem die R617 uit Underberg; Khotso is 10,6 km verder op regterhand. Koste En suite-dubbelkamer in die hostel R690 p.n. met gemeenskaplike kombuis. Rondawels: Vanaf R890 p.n. vir 2 mense, en R230 per ekstra persoon, R170 per kind jonger as 12, slaapplek vir 5. Houthuis: Vanaf R4 500 p.n. slaapplek vir 22 mense in 5 slaapkamers. Kontak 082 412 5540; khotso.co.za