Bakhala bayazithulisa abakwa-LifeLine
Muzi Zincume BASABHONGA emswanini abasebenzi bakwa-LifeLine Zululand ngokulahlekelwa ngusonhlalakahle, uMnuz. Trust Chipunha. UChipunha ugwazwe yizigebengu okusolakala ukuthi bezimbamba inkunzi eMpangeni kusihlwa ngoLwesiHlanu olwedlule. Uhlaselwe ngabasolwa ababili abafike bafuna umakhalekhukhwini wakhe ngenkani, maqede bafuna nesikhwama sakhe, nokuthe uma enqaba naso base bemgwaza entanyeni nasemhlane. Ube esephuthunyiswa esibhedlela eNgwelezane, nokuyilapho afike washonela khona.
Ushone ngemuva kokulinda amahora ayisihlanu, ukuthi aphuthunyiswe kohlinzwa kwesinye sezibhedlela eThekwini. Omunye wabasebenzi ebesebenza noMnuz. Chipunha, uNksz. Nompilo Maphumulo, uthe kusenzima ukukholwa yilesi sigameko.
‘Ubewumsebenzi ozimisele ngendlela eyisimanga, ehlonipha, futhi ezithobile.
‘Umsebenzi wakhe ubuzikhulumela wona, futhi esebenzisana kahle nawo wonke umuntu.
‘Ubenenhliziyo emnene, futhi ubenakekela bonke abalingani bakhe emsebenzini,’ kubeka uNksz. Maphumulo.
Uchaze umufi njengomuntu osebenze kakhulu nomphakathi wase-Melmoth, namaphethelo ebambisene nomunye wabasebenzi uNksz. Ntombiyenkosi Mzimela.
‘Bobabili bebefundisa umphakathi ngobubi bokuhlukumezana nodlame, aphinde abe ngumeluleki kulabo ebebeyizisulu zodlame.
‘Njengosonhlalakahle obetshwalwe esikhungweni samaphoyisa ase-Melmoth, okuyilapho ebesebenzisana khona nentsha eyikhuthaza ukuthi iziphathe kahle, ebuye ayinikeze nethemba lempilo.
‘Ubebuye asebenzisane kakhulu no-Constable Khumalo wasemaphoyseni e-Melmoth, ebuye futhi asebenzisane nosonhlalakahle behhovisi lezokuThuthukiswa Komphakathi,’ kubeka uNksz. Maphumulo.
UNksz. Maphumulo uqhube wathi uChupunha ubeyindoda ekholwayo, ebihlala imamatheka njalo.
‘Siyakhalisana kakhulu nomndeni wakhe, sibonga indlela abakhulise ngayo. Sibonga noNkulunkulu ukusipha ithuba lokwazana naye, futhi sikujabulele nokusebenza naye,’ kubeka uNksz. Maphumulo.
Okhulumela amaphoyisa uKpt. Mbongeni Mdlalose uthe amaphoyisa aseMpangeni aphenya icala lokubulala, kanti akukaboshwa muntu.
Sad death of LifeLine social worker