Bentetako urak arazteko hitzarmena berritua

Nafarroako Foru Komunitateak eta Euskal Hirigune Elkargoak elkarlana berretsi dute

URDAZUBI – Nafarroako Foru Komunitateak eta Euskal Hirigune Elkargoak Urdazubi eta Ainhoako biztanleei saneamendu-zerbitzu publikoa ematen jarraituko dute, izan ere, Lurralde Kohesioko sailburu Bernardo Cirizak eta Euskal Hirigune Elkargoko lehendakaria den Jean-rené Etchegarayk, 2010ean hitzartutako akordioa berritu dute aurten.

Hitzarmen horretan, Ainhoan dagoen arazketa-estazioa ustiatzeko baldintza teknikoak eta finantzarioak ezartzen dira, bai eta aipatutako udalerriei alta emateko saneamendu-zerbitzua ematea ere. Bien ustez, hitzarmenak “zalantzarik gabeko interes komuna” du, zerbitzu publiko hori mugaz haraindi erabiltzaileei emateko lankidetza indartzen duelako. Bide beretik, jarraipen-batzorde bat sortuko da, erakunde sinatzaileen ordezkariek osatua, hitzarmena indarrean dagoen bitartean sor daitezkeen gai interesgarri guztiak aztertzeko. Batzorde hori bi urterako ezarri da.

Zerbitzua emateagatiko kontrapartida ekonomikoa urtero kalkulatuko da ustiapen-gastuetan eta isuritako ur erabilien bolumenean oinarrituta, Ipar Euskal Herriko emari-neurgailuak neurtuta.

Bestalde, ekipamenduak mantentzeko eta konpontzeko lanak erakunde sinatzaileen kontura izango dira, instalatzen diren lurraldearen arabera.

Ainhoan kokaturiko arazketa estazioak Dantxarineko benten urak tratatuko ditu, izan ere, herriak bere instalazio propioa du 2019tik, zeinaren bidez herri gunea ez ezik, Hiribere eta Leorlas auzoko uren saneamendua egiten delarik.