La Voz de Galicia (Ferrol) - La Voz de Galicia (Ferrol) - Especial1
«Este inicio será tranquilo»
Anuncia que o que agora se pon en marcha será un curso con moita actividade nos colexios da cidade, con proxectos novos e de continuidade
Asegura estar «moi orgullosa do profesorado porque o esforzo que se fai cada ano é inmenso». Marián López preside a plataforma que agrupa aos directores dos centros públicos de Ferrol.
—Son días de moito traballo nos centros educativos. ¿Como o están xestionando?
—Parece que estamos de vacacións desde o 21 de xuño ata o 12 de setembro e realmente ímonos a finais de xullo e xa nos incorporamos a finais de agosto. Non daría tempo de outra maneira. O importante é que, independentemente dos recursos, todos os centros temos a capacidade de manobrar dunha maneira solvente.
—Os proxectos propios volverán completar á actividade lectiva máis tradicional.
—Efectivamente, unha vez que están organizados todos os centros só nos queda poñer en marcha os proxectos que temos aprobados, que son moitos. Agora mesmo incorporáronse numerosos centros da comarca ao proxecto de educación dixital E- Dixgal dirixido a 5º e 6º . Estamos continuamente incorporándonos aos diferentes proxectos que convoca a Xunta sen obviar os que temos desde os propios centros, que son moitísimos. Por exemplo, seguiremos traballando da man do Cefore, o plan de centros plurilingües ampliouse á educación infantil... Ademais, durante todo o curso van ir aparecendo cousas novas. As convocatorias van ir saíndo.
«As cifras de matriculación son similares ao ano pasado»
—¿Como cualificaría este inicio de curso?
—Será tranquilo, iso é o máis salientable. A verdade é que estamos a ter un inicio bastante tranquilo. Sempre hai moitos detalles que temos que retomar dun curso para outro, reunións co concelleiro de Educación, cos propios directores para unificar criterios dos centros públicos... Pero nada significativo.
—¿E os niveis de matriculación?
—As cifras que manexamos son similares ás do ano pasado cun lixeiro incremento durante o verán nalgúns centros educativos.