Zelaitik aulkitxora
ION KAMIO: “Beti ikusi izan dut nire burua entrenatzaile moduan, baina ez nuen aukera horren goiz etortzerik espero”
Atletico San Sebastian hockey taldeko entrenatzaile berria da Ion Kamio (Donostia, 1986). Jokalari izan zen hamalau denboralditan eta orain urte guzti hauetan ikasitakoa praktikan jartzeko prest dago. Asteburuan hasiko dute Liga Bera Beran, igandean 12:30ean, Bartzelonako Polo indartsuaren aurka: “Talde gaztea daukagu. Jende askok debuta egingo du Ohorezko A Mailan eta oro har esperientzia gutxiko jokalariak ditugu. Peio Azkoaga, Aitor Vitoria eta Iván Lorente beteranoak kenduta beste guztiak 25 urtetik beherakoak dira”, kontatu du.
Etorkizunera begira oso datu ona da, gaur egun goi-mailan lehiatzeko “gabezia” batzuk izango dituztela onartzen duen arren: “Gure proiektuaren oinarria hori da, harrobia. Momentu batean iritsi behar zuen, duela bi urte erabaki genuen jokalariak kanpotik ekarri beharrean taldearen bizkarrezurra etxekoekin osatzea”. Pixkanaka Atletico zentzu horretan hazten ari dela ikusten du: “Gazteak garrantzia hartzen ari dira. Duela bi urte, jaitsieraren aurretik, Ohorezko A Mailan minutu gutxi batzuk jokatzen zituztenak orain titular dira”, adierazi du.
Aulkitxoan esperientzia berria du Kamiok gizonezkoen talde igo berriarekin, baina aurreko hiru urteetan Realeko bigarren taldea entrenatzen aritu da emakumezkoetan: “Aldea dago emakumezkoetatik gizonezkoetara, taldekide ohiak entrenatzen ari naiz mailarik altuenean eta kirolari onenen aurka, baina ilusioz beterik eta lan egiteko gogo pila batekin nago”.
Aukera era natural batean etorri zaio Ion Kamiori. Aurreko denboraldian Kike Suárez entrenatzaileak ez jarraitzea erabaki zenean etxeko batekin froga egitea pentsatu zuen klubak: “Planteatu eta bi aste eman zizkidaten pentsatzeko, klubaren babesa sentitu nuen eta aldaketa egitera animatu nintzen. Beti ikusi izan naiz entrenatzaile bezala, baina agian ez horren goiz”, aitortu du. Langintza horretan ez da bakarrik ari, hiru lagun daude staff teknikoan, Ionen anaia Iker Kamio bigarren entrenatzaile eta dietista moduan eta Oinatz Iparragirre prestatzaile fisikoa: “Hirurok ideia berriak sartzen eta entrenamendu kargak handitzen ari gara. Elikadura, dieta, entrenamenduan zehar eta ondorengo hidratazio eta suplementazioa… Gauza berri asko dira eta taldea guk pentsatutako guztiari baiezkoa ematen ari zaio”.
Zentzu horretan, lan jarrera “primerakoa” izaten ari dela dio Kamiok: “Ekainetik hona oso ondo entrenatu dugu, udan bi aste besterik ez genizkien jai eman uztailean eta jarrera on hauek urteetan zehar mantendu behar ditugu klub bezala handitzeko”, egin du hausnarketa.
Dena ez da arrosa kolorekoa ordea, duen postutik erabaki zailak hartzea ere tokatuko zaio denboraldian zehar: “Oso argi daukat. Jokalari bezala ezberdin pentsatzen duzu, baina orain entrenatzaile naiz. Badakit entrenatzaile moduan zer eskatu eta zer ez, askotan erabakiak hartu behar dira eta ziur batzuk ez direla atseginak izango, baina taldearen onerako hartu behar badira, hartuko dira. Lehenengo egunetik esan nien pertsona ezberdina naizela jokalari edo entrenatzaile gisa. Kontziente naiz agian nik jokalari bezala eman ezin izan ditudan gauza batzuk eskatuko dizkiedala”, onartu du umiltasunez.
Luzerako proiektua izan dadin gustatuko litzaioke Ion Kamiori, baina itsutu gabe: “Oraingoz astez aste, gero hilabetez hilabete eta ahal bada denboraldiz denboraldi joatea gustatuko litzaidake. Denok zentzudun jokatuz epe luzera Atleticoren hockey proiektu hau haztea eta moldatzea da asmoa, hockey klub bezala handitzea eta bide horretan lan egiteko prest gaude”