Oztopoz oztopo, aurrera
ASIER LANDART: “Hemendik aurrerako lasterketak prestakuntza gisa hartu nahi ditut ekainean Danimarkan eta urrian Ingalaterran topera egoteko”
Europako eta Munduko txapelketetan lehiatzeko txartela poltsikoratu berri du Asturiasen Asier
Landartek (Irun, 1990). Ekainean Esbjergen eta urrian Londresen egongo da munduko onenen artean Obstacle Course Racing (OCR) deritzen oztopo-lasterketetan partehartzen. Laburbilduz, korrika egin behar izaten dute kirol honetan, zortzi kilometrotik gora normalean eta tartean trabak gainditu behar dituzte. Ohikoa da lokatza, ura, sua, egurrak, harriak, gurpilak, sokak… Era guztietako materialak topatzea halako lasterketa batean. Epaileak egoten dira oztopo bakoitza egoki igarotzen dutela zaintzeko.
Estatuko onenetakoa da Landart, Farinato Gijon proban erakutsi zuen bezala: “Sasoi onean nindoan, podiuma zapaltzeko asmoarekin”, aitortu du. Azken unera arte ez zen erabaki garailea nor izango zen: “Oso indartsu atera nintzen eta helmugatik gertu 50 metroko txarrantxa alanbrea geneukan. Arrastaka pasa behar genuen txorkatilak brida batekin lotuta genituela, hanketako mugikortasunik gabe. Hor metro batzuk atera nizkion Israel Ferrero bigarren sailkatuari, baina harrapatu egin ninduen berriro eta 500 metroren faltan hil ala bizi erasoa jo eta irabazi egin nuen”, azaldu du proba.
Garaipenak balio bikoitza zuen. Mundialerako txartela eskuratu zuen berriro. “Iaz ere lortu nuen Estatu Batuetara joateko eskubidea, aurten baino dezente gehiago kostatu zitzaidan sailkatzea egia esan, baina laguntza gutxi ditudanez, ekonomikoki ezin izan nion aurre egin eta ez nintzen joan. Aurten ziur egongo naiz Londresen, aurreztu eta han egon nahi dut”, bota du seguru.
Mundialean maila “ikaragarria” izango dela jakitun, ez du helburu zehatz bat jarri nahi izan
Landartek: “Ezer alboratu gabe, konpetitzera joan nahi dut Londresera. Gustatuko litzaidake proba guztian zehar lehiakor izatea. Nazioarteko halako lasterketetan besoak asko nekatzen dira denbora asko egiten dugulako zintzilik eta oztopo batean huts egiten baduzu, postu on bat lortzeko aukerak ihes egiten dizu”, kontatu du Denontzat gimnasioko atletak.
Hain zuzen ere, gimnasioko lana bai, baina 8, 10, 15 edota 20 kilometroko lasterketa hauetan “%80 erresistentzia” dela aipatu du. Horregatik entrenatzen du Super Amara-Bidasoa Atletiko Taldeko iraupen luze eta erdiko atletekin: “Ezinbestekoa da zure mailan edo azkarrago lasterka egiten dutenekin entrenatzea, euren mailara iristen saiatzen naiz, serie azkarrak egiten ditugu elkarrekin eta nire lasterketetan nabaritu egiten da hori”.
Astebete normal bateko lan-karga zein izaten den zehazteko eskatu diogu Landarti: “Astelehenenetan 14km korrika suabe eta gimnasioan gorputzaren beheko aldea lantzen dut; asteartean sei kilometro eta goiko aldea. Asteazkena serie eguna da, adibidez 10 x 1000 m minutu bateko errekuperazioarekin 3:20/km erritmoan edota 3:05/ km hiru minutuko errekuperazioa badaukagu. Ostegunetan aldapak, eskailerak... Oro har beheko aldea lantzen dugu. Ostiral goizetan fartlek gisako entrenamendua zintan edo bizikleta estatikoan eta arratsaldean alor teknikoa Hernaniko Denontzat gimnasioan: uztaiak, sokak, bolak... Larunbatean, 18-20km trail mendian eta igandean gogoen arabera atseden hartu edo mendira berriro”, azaldu du irundarrak.
Hainbeste sakrifiziok fruituak eman dizkio. Garaipenak Cascanten, Gijonen, Galdakaoko Eternalean eta Asturiaseko Bunkai Extremen, bigarren postua Iruñeko Gladiator lasterketan eta bosgarrena Bilboko Spartan Racen: “Hemendik aurrerako lasterketak prestakuntza gisa hartu nahi ditut ekainaren 29an Danimarkan eta urriaren 19an Londresen topera egoteko”. Oztopoz oztopo, aurrera egin nahi baitu