Salto eta jauzi
“Jauzia teknikoki ondo egiten dudanean eta pertikak gora jaurtitzen nauela sentitzean gozatzen dut benetan, ez dut gehiago behar”
Berlinek itxaron egin beharko du. Asteburuan lau haizetara zabaldu da Europako Atletismo Txapelketarako gutxieneko marka lortu zuela, baina bost zentimetrora dauka oraindik minima hori Maialen Axpek (Arrasate, 1993). Iruñean, Larrabideko modulu estalian, 4,40 metroko saltoa egin zuen Atletico San Sebastianeko pertikajauzilariak eta Naroa Agirre (4,56m) buru duen estatuko ranking historikoan laugarren kokatu da aurrez zeukan marka pertsonala hamar zentimetroan hobetuz.
Sentsazio gazi-gozoak dauzka ondorioz Axpek. “Gaizkiulertu” bat tarteko, gutxieneko markarik ez poltsikoan, baina “sekulako jauzia” eginda pozik zegoen: “Francis Hernandez nire entrenatzailea Espainiako Federazioko pertikaren arduraduna ere bada eta eskuartean zeuzkan dokumentuetan 4,40m nahikoa zela jartzen zuen”. Hala ere, Europako Federazioaren orrietan argi ikusten da 4,45m eskatzen dutela: “Ramon Cidekin egon gara, RFEAko zuzendari teknikoarekin, eta azkenean 4,45 dela baieztatu digu. Ez da ezer pasatzen, markoi bat da eta Berlin ez da obsesio bat. Nahikoa daukat poliki-poliki hobetzearekin”, azaldu du umiltasunez.
Larunbateko txapelketaren bilakaera dagokionez, hamarnaka egin zuen gora 3,87 - 3,97 eta 4,07m lehenengoan pasatuz: “Pertika bigunekin hasi nintzen teknikoki proban sartzeko”. Ondoren 4,21 eta 4,32 ere gainditu zituen eta pokerrean esaten den bezala “all-in” egiteko garaia etorri zitzaion. Karta guztiak mahai gainean jarri zituen: “Pertika gogorragoa hartu eta kale edo bale, pentsatu nuen”. Bandera zuria. 4,40 metroko langa bigarren saiakeran pasa zuen: “Entrenatzaileak esan zidan hortxe uzteko, baina oso ondo nengoenez aprobetxatu egin nahi nuen”. Hurrengo listoiaren altuera 4,45ekoa zen eta ia hiru ordu ziren Axpe berotzen hasi zenetik: “Lehen saiakera oso ona izan zen, bigarrena ez hain ona”. Hirugarrenari uko egin zion entrenatzaileari jaramon eginez: “Orain minima 4,45 dela jakinda, saiatu beharra neukan ziurrenik”, kontatu du etsipen pixka batekin. Gertatutakoa gaindituta, Axpek nahiago du egindakoaz gozatu eta irakurketa baikorrak ateratzea, damutzen hasi baino: “Inoiz baino azkarrago nago, nire karrera 14 urratsetatik 16ra aldatu dut eta eroso sentitzen naiz lasterketa berri honekin. Zenbat eta azkarrago heldu, pertika zenbat eta azkarrago sartu, gorago zoaz, saltoa dinamikoagoa da eta gehiago jaurtitzen zaitu gora, baina kontrola mantendu behar da”, jakinarazi du.
Amaitu berri duen pista estaliko denboraldiaren balorazio “oso ona” egiten du. 4,40ko markaz gain, brontzea eskuratu zuen bi aste atzera Valentzian, Espainiako indoor txapelketan 4,16m saltatuta. Orain astebetez atseden hartu eta aire libreko denboraldiari begira jarriko da: “Indarra, abiadura eta teknika hobetzen jarraitzea da asmoa”.
Etorkizunari begira, lehiaketa dezente dauzka agendan Axpek: Espainiako Txapelketak, Ohorezko Mailan Ligako hiru jardunaldi Atleticorekin, lehenengoa apirilaren 28an Donostian dauka gainera, eta Mediterraneoko Jokoak ere egingo dira ekainean Tarragonan. Burubelarri entrenatzeko eguraldi baldintza hobeak izango dituzte udaberritik aurrera eta normalean aire librean gehiago saltatzen da: “Pista estalian ez dut asko konpetitu, fresko nago, sentsazio onekin eta lesioek errespetatzea bakarrik eskatzen dut”.
Bitartean, koltxonetaren inguruan jarraituko du, gaztetxoei multikirol eta atletismo saioak ematen eta pertikarekin jauzika, hurrengo abenturaren bila: “Txapelketa garrantzitsuenetan, gauzak ateratzen ez zaizkizunean eta bi eguneko beherakada datorkizunean, badirudi irteerarik gabeko gela batean sartzen garela… Disfrutatzeaz ahazten gara”, egin du hausnarketa Maialen Axpek. Besterik gabe, saltoka bizi ahal izatea bezalako domina edo markarik ez baitago