Urte eta erdian, urrea
LIDE ERBINA: ”Amaia ahizpa selekzioan telebistan ikustetik, telebistako parte izatera pasa naiz denbora gutxian”
Europako rugby txapelduna da Lide Erbina (Ordizia, 2000). Titulua irabazita, oraindik “ametsetan” dagoela dio: “Ez dut sinesten, errealitatera bueltatzen ari naiz”. Hein handi batean, espero gabekoa izan baita beretzat Belgikan bizitakoa. Urte eta erdi soilik darama errugbian eta dagoeneko urrezko domina dauka kontinente mailan: “Europeoa jokatu nahi nuen eta posible balitz irabazi, baina debuteko helburua batez ere ikastea eta esperientzia hartzea zen. Denbora gutxian eurak telebistan ikustetik, telebistako parte izatera pasa naiz”. Sari doblearekin itzuli da etxera.
Finalaurrekoetan Alemania kanporatuta, finalean Herbehereak garaitu zituen Espainiako selekzioak 40-7ko emaitzaz: “Ematen duena baino gogorragoa izan zen. Zelaiko markagailua oso txikia zen, makilen atzean zegoen eta iaia ez genuen ikusi ere egiten... Holanda zen faborito gure taldea oso gaztea delako, 17-18 urteko errugbilari asko sartu dituzte selekzioan; belaunaldi aldaketa egiten ari dira 2021eko Australiako Mundialera begira”, azaldu du. Beretzat azterketa serioa izan zen asteburukoa: “Titular atera nintzen eta presio handia neukan… Halakoetan garrantzitsua da esperientziak ematen duen lasaitasuna izatea. 12ko postuan jokatu nuen zentroan, baloi asko izan nuen eta jokoa nire eskuetatik pasatzen zen. Hasieran kostatu zitzaidan finaleko dinamikan sartzea, baina erritmoa hartzean, akatsak akats, konfiantza hartu eta entseguko pase bat ere eman nuen. Gakoa defentsan egon zela uste dut, bikain aritu ginen”, egin du Bruselan bizitakoaren kronika Erbinatarren artean gazteenak. Amaiaren alboan jantzi du urrea, bere ahizpa eta “erreferente” nagusiaren ondoan: “Asko lagundu dit zelai barruan zein kanpoan. Nola jokatu, nola hitz egin, ze gauza egin behar diren selekzioan eta zer ez… Plus handia izan da. Berak zerotik landu behar izan du bidea, urrutira iritsi da eta nik zortea izan dut ikusi dudalako zer nolako sakrifizioa egin duen, zenbat gauza utzi dituen albo batera eta nola saiatu den. Indarra ematen dit ahizpak, nik ere lor dezakedala erakutsi dit”, azaldu du Orkli Ordizia taldeko jokalariak.
Nahiz eta orain Madrilen bizi den Amaia, zelaian etxean bezain ondo konpontzen direla kontatu du Lidek barre artean: “Harreman ona daukagu eta mantentzen dugu kontaktua Skype, Face Time edota telefono bidez”. Ahizpa bakarrik ez, familia osoa egon da betidanik errugbiari lotuta: aita, osaba, lehengusuak, anaia… Izen ezagunak dira Altamiran Iñaki ‘Dingi’ aita, Beñat anaia Ampo Ordiziako jokalaria, Aitor eta Axio Araña… Senitartekoak denak.
Dena den, saskibaloian eta atletismoan ere nabarmendu zen Lide errugbirako urratsa eman aurretik: “Gipuzkoako selekzioan jokatu nuen lau urtez hegal-pibot postuan eta Euskadikotik gertu ere egon nintzen. Atletismoan abiadura egiten nuen 80m hesiak, 100m, erreleboak… Oso garrantzitsua da azkarra izatea errugbian, batez ere sevenean”, dio gazte ordiziarrak.
Bi kirolak uztartu zituen udara batean errugbia probatzea erabaki zuen arte: “Amaia seveneko selekzioarekin hasi zenean maitemindu egin nintzen, XVa ez zitzaidan gehiegi gustatzen kontaktuagatik batez ere… Nahiago izan dut betidanik zazpiko errugbia, hobeto datorkit”. Behin hamabostekoan kontinente mailako urrea lortuta, aurrera begira jarri da Lide Erbina. Sevena du ilusio, modalitate olinpikoa, eta amestutako aukeragatik borrokatzeko irrikaz, beldurrik gabe esaten du: “Tokio 2020 da nire hurrengo helburua”