Zigorkolpeak
JULEN GOIA “Barrutik jakinda bost urte hauetan ze sakrifizio eta lan egin den, oso gogorra da epaile batek adarra jotzea”
Munduari bira eman diote irudiek. Belgika-Espainia partidaren ostean Espainiako jokalari batzuk
Iordaschescu epaile errumaniarrari jarraika eta oihuka, estadiotik aterarazi arte. Irabazi beharra zeukaten 2019an Japonian jokatuko den Munduko Txapelketarako sailkatzeko eta 18-10 galdu zuten. Ondorioz, Errumaniak lortu du txartela. Europako Errugbi Federazioko presidentea ere errumaniarra da eta anabasa itzela sortu da. Espainiako selekzioko kide da Julen Goia (Idiazabal, 1991): “Lur jota gaude, non gauden ez dakigula”.
Titular nagusi batzuk utzi ditu asteburuak, bata epailearen lana: “28 zigor-kolpe adierazi zituen eta neurketa internazionalen bataz bestekoa zortzikoa da. Errusia eta Errumaniaren partidetako zigorkolpeak gehituta, ez gara 28ra iristen eta Alemaniaren aurka lau adierazi zizkiguten. Belgikan hiru minuturo adierazi ziguten bat, ez da normala”, azaldu du Goiak. Partida hasi aurretik, otsailean, Espainiako Federazioak errekurtso bat jarri zuela kontatu du zelaiko hiru epaileen naziotasunagatik. Ukatu egin zieten.
Autokritika ere egiten du ordea: “Kontaktuak galdu genituen, laguntzetara berandu iristen ginen eta ez genituen zuloak topatzen. Izugarri zegoen jokoan, tentsioa nabari zen askorentzat Mundial batean egoteko aukera bakarra zelako”. Aurretik, euforia moduko bat sortu zen irratietan, telebistan eta prentsa idatzian: “Irabazitzat ez, baina suposatzen genuen posible zela iaz 30-0 irabazi genielako. ‘Boom’ hori aprobetxatuz, Erregea etorri zen Centralera 15.000 lagunekin gure partida ikustera, CSDn pare bat aldiz egon gara sekula egon ez garenean… 80 minutu horien zain geunden”, onartu du.
Ez zuten irabazi ordea eta partida ostean Julen Goiaren selekzio-kide batzuek irudi kezkagarriak utzi zituzten: “Jazarpen bat egon zela egia da. Beroan ez duzu buruarekin pentsatzen eta modu ezberdinetara jokatzen duzu. Batzuk negarrez, besteak belauneko eta besteak epailearen atzetik. Ez zen erreakzio egokiena izan eta espero dut ez errepikatzea. Baina egia da barrutik bizituta bost urte hauetan ze sakrifizio eta lan egin den, oso gogorra dela epaile horrek adarra jotzea. Esaten dugu errespetatu behar dela, eta hala da, baina epaileak kontziente izan behar du baloi bakoitzean literalki lepoa jokatzen ari denari ere errespetua zor zaiola. Zelaian gertatzen dena pitatzea besterik ez dugu eskatzen”, adierazi du Ampo-Ordiziako hegalekoak.
Askotan esaten da errugbia kirol ezberdina dela eta baloreak transmititzen dituela. Hirugarren denbora, aurkariari txisturik ez, autoritateari errespetua, giro ona harmailetan… Kontua da asteburuko irudiek ez dutela gezurrik esaten: “Ez da hain ezberdina, hori hala da, gizakiak garelako bai futbolariak, pilotariak, golfariak eta errugbiko jokalariak ere bai, jakina”, azpimarratu du Julen Goiak. “Barruko su hori edozeini atera dakioke”.
Berak ez zuen asteburuan jokatzerik izan, 30 hautatuen artean “egote hutsa” asko den arren Idiazabalgoarentzat: “Iaz sorbalda bi aldiz atera, ebakuntza egin eta urte osoa galdu nuen. Ez dut nahi adina jokatu, baina konforme nago, ez nuen pentsatzen denboraldi hasieran honaino iristerik Santi Santos hautatzaileak jokalari on asko dauzkalako aukeran”. Horietako gehienak atzerritar nazionalizatuak dira: frantziarrak, argentinarrak, Zeelanda Berrikoak… “Aldagelan frantsesez hitz egiten dugu”.
Orain birsailkatze fasea dute buruan: “Portugal maiatzean eta irabaziz gero, Samoa selekzio zaila”. Beste aukera bat bada, bihar erabakiko dute Belgika-Espainia partida errepikatuko den ala ez: “Nik uste epailea santzionatuko dutela, baina partida bere horretan geratuko da, aurrekari bat sortzea litzatekeelako”. Lanean jarraitu behar