Kopako MVP
IMANOL GARCIANDIA “Sariak ez zidan ilusio berezirik egin finala galdu berritan, baina egunak pasata oso baloratua sentitzen naiz”
Beste urrats bat eman du bere kirol ibilbidean Imanol Garciandiak (Urretxu, 1995). Madrilgo Errege Kopako finalean jokalari onenaren saria jaso eta goleatzaile nagusia izan da. Bartzelonaren aurka 35-28 galdu arren, lateral gipuzkoarrak duen kalitatearen berri eman du. Logroñoko udalean autoritateek egindako harreratik aterata hitz egin dugu berarekin: “Badago hirian eskubaloirako afizioa, ia 2.000 lagun etortzen dira gu ikustera eta taldea duela hamabost urte sortua dela kontutan hartuta, Errioxako klub garrantzitsuenetakoa bilakatu da”.
Denera bederatzi gol sartu zituen asteburuko finalean, horietako zazpi lehen zatian: “Asko dira, Asobal mailan seguru ez ditudala sekula hainbeste sartu. Normalean zati bakoitzean 15 bat gol egiten ditu talde bakoitzak eta ia erdiak zuk bakarrik sartzea ezohikoa da”, aitortu du. Prentsaren arreta deitu eta publikoaren ahotan ibili da azken egunetan Garciandia: “Garaikurrak eman zizkidaten momentu horrek ez zidan ilusio handiegirik egin egia esan, finala galdu izana gertuegi zegoen. Halere, bi egun beranduago eta orduak pasata, oso pozik nago nire lan indibiduala oso baloratua izan delako”, adierazi du eskertuta.
Kontua da eliteko kirolariak beti nahi izaten duela gehiago eta halako neurketak galtzea mingarria dela beti: “Kopa irabaztea oso zail genuen, baina final guztietan titulua da esperantza”. Final-laurden eta finalerdietan Anaitasuna eta Ademar kanporatu zituzten eta helburu “errealista eta logikoak” jarrita, eurei “eskatzea posible zena” lortu zutela zela dio, finalerako sailkatzea. Behin bertan, Bartzelona ahalguztidunak bere legea ezarri zuen: “Goi-mailako nazioarteko hamasei jokalari dauzkate eta aulkitxoko errotazio horiek gehiago nabaritzen dira hiru egunez jarraian jokatzen den txapelketa batean. Ez dute inoiz euren maila jaisten”, azaldu du MVPak.
Kopa amaituta, Asobal Ligako azken bi jardunaldietan buru-belarri murgilduta dago BM Logroño La Rioja laugarren sailkatua. Txapeldunen Ligarako txartela ematen duen bigarren postua daukate jokoan Ademar eta Granollersekin: “Irabazteko asko eta galtzeko gutxi daukagu. EHF Koparako sailkatuta gaude final hau jokatu dugulako eta Ligan geratzen diren biak irabazita, lor dezakegu koska bat gora egitea”, dio ziurtasunez.
Garciandiak badaki aurrez Txapeldunen Liga jokatzea zer den, pasa den bi urteetan aritu da EHFCL-n. Pentsaezina hamabi urterekin eskubaloian hasi zen mutiko harentzat: “Orduan esan izan balidate, ez nukeen sinetsiko. Urretxun hemezortzi urtera arte ibili nintzen, han nengoela Elgoibartik deitu eta I. Nazional mailan jokatzeko aukera eman zidaten. Asobalera iristeko inongo esperantzarik gabe hara joatea erabaki nuen eta hango entrenatzaileen bitartez Bidasoa eta Logroñorekin kontaktutan jarri ginen, hona etortzeko aukera sortu zen eta hemen nabil duela hiru urtez geroztik”, dio irribarretsu.
Gustura dago hirian eta klubean. Taldekideen artean gainera,
Gurutz Aginagalde atezain irundar beteranoa dauka, Asobalen 600 partidatik gora jokatu dituen gizon bakanetakoa: “Eredu bat da, aholkuak jasotzeko eta ikasteko aukera handi bat. Lan asko egiten du taldearen alde, bereziki aldagela barruko lan psikologiko hori. Atezain bezala oso ondo aritzen den arren, bere lana ez da atezain izatea bakarrik. Idolo bat da, erreferente bat, kapitaina”. Errioxako hiriburuan elkartuta daude beraz atezain-kapitain beteranoa eta Kopako MVP gaztea. Gipuzkoako labela