Bultza Hernani
Zazpigarren denboraldia egingo du jarraian Hernanik Ohorezko Mailan. Ligan azkenaurren geratu ondoren jokatu beharreko playoutean, maila nagusiari eusteko azken aukeran, Ciencias talde andaluziarra gailendu dute. Talde gipuzkoarreko kapitaina, Beñat Iradi (Hernani, 1995), harro dago egindakoaz: “Lortutakoa garrantzitsua da klubarentzat. Aurreko urte batzuk onak izan dira guretzat, baina aurten sufritu egin dugu baja aldetik, gazteok asko tiratu behar izan dugu taldetik eta kosta egin zaigu momentu batzuetan”, onartu du.
Salbazioa lortuta, aldagela nola dagoen kontatu du: “Oso gustura gaude, askorentzat egoera berria zen, askok aurretik ez zuen jokatu halako partida garrantzitsurik eta tentsio hori nabari zen”. Joanekoan lau goleko aldegatik galdu zuten Sevillan, baina Landaren asteburuan 30-17 irabazita markagailua irauli eta helburua bete zuten: “Hango neurketari beldur gehiago nion hemengoari baino. Joanekoan ez ginen behera etorri, jakin genuen gaizki jarri zitzaigun partidari eusten eta hemen etxean seguruago ikusten nuen egoera”, azaldu du Iradik.
Lau puntuko desabantaila zeukaten eta errugbian beti gerta daitekeela edozer: “Azkenean entsegu bateko aldea zen, bost puntukoa, edo makiletara bi ostiko, sei puntu eta aurrera egingo genuen. Nik banekien abantaila hori hartzea posible zela, zaleek asko lagundu ziguten gainera. Larunbat goizean ohi bezala entrenatzera jaitsi ginen, zaparrada baten azpian, bazkaldu eta gero arratsaldean partida ostean disfrutatzeko aukera izan genuen zorionez”, egun paregabea beraz Patrick Polidorik zuzendutako Hernani CRE taldeko kideentzat.
Malkotik irribarrera, sarritan, urrats txikia egoten da ordea. Urte guztiak ez dira berdinak izaten: “Hortxe gabiltza, promozio batzuk jokatu ditugu, urteren batean azken partida arte azkenak joan eta azken partida horretan zuzenean salbatu gara… Denboraldi zailak dira eta sufrituz ikasten duzu egoera eramaten, badakigu hori dela gure borroka”. Denboraldia ez da erraza izan hernaniarrentzat hutsune garrantzitsu batzuk eduki dituztelako: “Taldea osotasunean edukiko bagenu, beste postu batean bukatuko
BEÑAT IRADI “Denboraldi zail hauetan sufritzen ikasten ari gara, badakigu hau dela gure borroka”
genukeela uste dut. Puntu dezente atera dizkigute aurrekoek, baina adibidez Santboiana edo Gernikaren aurkakoak jokaldi batengatik edo justu galdu ditugu. Errematatzea falta zaigu eta hori hobetu behar dugu aurrerantzean”, egin du autokritika. Datorren denboraldiari begira baikor da Beñat Iradi: “Gazte batzuk igoko ditugu eta ea lesionatuta egon diren edo seveneko hitzorduengatik gehiegi jokatzerik izan ez duten Collado, Genua eta Mintxeta bezalako titularrak berreskuratzen ditugun”.
Batzuek edo besteek jokatu, Hernaniren filosofiak berbera izaten jarraitzen du oraindik harrobiko eta inguruko jokalariez hornituta, baina testuingurua aldatzen ari da pixkanaka. Errugbiaprof es ion ali zatz en jo anda azkenh amar ka dan babesle, telebista eta aurrekontuei dagokienez. Oso bestelako egoeran eman zituen lehen urratsak Iradi aurrelariak: “Baserri zalea nintzen txikitan, futbolean ere probatu nuen, baina lagun batzuek tiratuta hamar urterekin errugbian hasi eta hemezortzirekin lehen taldean sartu nintzen”.
Zenbaitetan egunerokoan “sakrifizioak” egitera daraman arren, ez luke ezerengatik utziko errugbia: “Lau ordu ikasi, lau ordu lan eta ondoren entrenatzera joaten naiz. Asteburutan bidaiak daude eta pixka bat baldintzatzen dizu bizitza, gainera aurten kapitain berriaren papera gogorra izan da niretzat, baina errugbian jokatu ondoren taldekideekin zerbeza batzuk hartzera joatean konturatzen zara merezi duela”