Ziabogaz ziaboga
NADETH AGIRRE “San Juanen pare ibiltzea da gure helburua eta salto hori emateko gai garela uste dut”
Orioko patroia da Nadeth Agirre (Orio, 1993) eta ontzia “indartsu” ikusten du Portugaleteko bandera irabazi berritan: “Bloke handi batek jarraitu du, hiruzpalau arraunlarik utzi dute eta beste hiruzpalau etorri dira. Jende aldetik ondo gabiltza eta hori garrantzitsua da norbait lesionatzen bada aldaketak egiteko batez ere”, adierazi du.
Ez dira orain arte eman duten maila mantentzearekin konformatzen, helburua “gora egitea” da Agirreren esanetan: “Badakigu San Juan dela azken urteetan puntan ibili dena eta gure asmoa eurengana iristea da. Salto hori emateko gai garela uste dut”, azpimarratu du oriotarrak. Aurre-denboraldian Euskadiko Trainerila Txapelketa irabazita erakutsia dute zertarako gai diren: “Geroz eta gertuago eta gogo gehiagorekin gaude, motibazioa sortzen du horrek”, onartu du.
Pixkanaka badatoz ate-joka Kantauri Itsasoko hitzordu garrantzitsuenak, hamar egun barru Euskotren Ligara sartzeko sailkatze estropadak dituzte Sestaon eta Zierbenan. Ezinbestekoa da oriotarrentzat txartela lortzea, “garbi daukagu hor egon behar dugula”. San Juango batelerak ikusten ditu arerio nagusi banderen borrokan ibiltzeko: “Akatsik egiten ez duena edo akats gutxien egiten dituena irtengo da garaile”. Hibaikak koska bat behera egin duela nabari du: “Baja asko izan dituzte eta trainerua jende gaztearekin osatu dute, urte batzuk beharko dituzte berriro mailarik onenera iristeko”, egin du iazko bi aurkari nagusien analisia.
Berritasun nagusi bat ere badakar aurtengoak, Euskotrenen azpian kokatuko den ETE (Emakumeen Traineru Elkartea) Ligaren sorrera. Nobedade “positiboa” izango dela pentsatzen du emakumezkoen arraunarentzat: “Gipuzkoako Ligarekin erreta geunden, estropada batzuk betelana egiteko soilik zeuden eta ez ziren kalitatezkoak. Egoerari buelta eman nahian, denboraldi bukaeran elkartu eta zerbait egitea posible ote zen hausnartzen hasi ginen. Ideia ezberdinak planteatu ziren eta guk klub bezala garbi geneukan bi liga behar genituela traineru guztiak ez gaudelako maila berean”, azaldu du.
Hamalau jardunaldiak amaituta, igoera eta jaitsiera play-offak jokatuko dira bi ligen artean: “Antzeko estropada kopurua edukita aukera berdintasuna izatea da asmoa”, dio Agirrek. Zortzi urte daramatza ontziko patroi eta fase ezberdinak, denetariko egoerak bizi izan ditu 2010ean lehenengoz Oriok ontzia uretaratu zuenetik: “Urtetik urtera egoera aldatzen joan da eta ikusten dugu geroz eta hobeto gaudela eta geroz eta gehiago eskatzen diogula bakoitzak geure buruari, zentzu guztietan”.
Kirol aroan ere exijentzia gorena da, astean sei egunetan ateratzen dira uretara eta jaiegun bakarra daukate: “Balore mordoa irakatsi dit arraunak, taldearekiko konpromisoa eta sakrifizioa besteak beste”. Ametsek prezio bat izaten baitute normalean: “Kontxako Bandera irabazi nahi nuke erretiratu aurretik, Liga irabaztea ere sekulakoa litzateke, baina oriotarra izanda guretzat Kontxa, Kontxa da”.
Ametsak lortzeko bide horretan, lanean jarraituko du ziabogaz ziaboga kirola, lana, eta ikasketak uztartuz: “Haur Hezkuntza titulua daukat, herrian ludotekan eta Gaztelekuan egiten dut lan eta orain online ikasten ere banabil. Sekula ez dut trabarik izan arraun mundua eta ikasketak uztartzeko, ondo moldatzen naiz”, dio 25 urteko gazteak.
Noizbait bukatu egingo da ordea kirol ibilbidea eta ideiak argi dauzka momentua heltzen denerako: “Traineruak jarraitu behar badu, gustatuko litzaidake herriko neska bat izatea patroi. Ea atzetik baten bat datorren”