Hegoafrikako zilarra
PATXI ITUARTE ETA IÑAKI GOIKOETXEA “Hegoafrikan lortutako dominak motibazioa eta ilusioa sortu digu Getxon 2020an jokatuko den Munduko txapelketari begira”
Zilarrezko dominarekin itzuli dira etxera Patxi Ituarte (Mutriku, 1976) eta Iker Goikoetxea (Ondarroa, 1976). Hegoafrikan Munduko Lur Gaineko Sokatira txapelketan lehiatzen aritu dira euskal selekzioko tiralariak eta 720 kiloko mailan Holandaren aurka galdu zuten finala: “Halako premioa lortuta, gure kirol txiki honetan jarraitzeko motibazioa ematen digu”, azaldu dute. Afrika hegoaldera egindako bidaiak oroitzapenak ekarri dizkio Patxi Ituarteri: “Bidaia polita da, 2002an hemen bertan izan ginen txapelketan eta berriro etorri gara munduko beste puntara”. Aurkari, besteak beste, Alemania, Herbehereak, Ingalaterra, Txina Taipei eta planetako txoko ezberdinetatik etorritako klub eta selekzioak izan dituzte: “Jendea ere hurbildu da ikustera, giro ona izan dugu. Ingelesa dakienak aukera handia izan du harremantzeko”, bota du barrez. Iker Goikoetxearentzat ere “esperientzia aparta” izan da: “Urte guztiko sakrifizioek saria jaso dute”, nabarmendu du. Emaitza “zoragarria” izan dela dio: “Talde ezberdinetako kideak batu gara selekzioan eta zilarra baloratzekoa da. Egia da Holandak zaldiak arrastan bezala eraman gintuela finalean, erraz irabazi ziguten, baina gainontzeko guztiekin borrokan ibili ginen. Hasierako takateko fuerte horri eutsi eta aurrera, ez dago sekreturik”, egin du kronika Ondarroakoak. Euskal tiralariek oro har emaitza politak lortu dituzte, zazpi domina kolkoratu dituzte denera: “Horren liga txikia edukita, hiru ekipo lur gainean, eta halako uzta ekartzea uste dut ez zuela inork espero oso federazio txikia garelako”, azpimarratu du Ituartek. ‘Basque Country’ izenpean aritu dira nazioartean lehian eta horrek “poz puntua” sortzen diela ez dute ezkutatzen: “Ikaragarria da ikurrina ikustea Hegoafrikakoa eta Holandakoaren ondoan”. Selekzioka bakarrik ez, taldeka ere lehiatu dute Mutrikukoek eta laugarren postu bat eskuratu zuten: “Ekipoa egiteko sasoian gaude, enbor bat mantentzen dugu eta handik jende berri bat akoplatu eta ez akoplatu ibiltzen da, taldea egiten ari gara eta egoera honetan emaitzak lortzea zaila da, lanean jarraitu behar”, aitortu du Patxi Ituartek. Herriko klubean jende aldetik “oso gutxi” daudela diote eta probatu nahi duen orori zabaldu dizkiote ateak: “Justuan gabiltza beti eta horrela ibiliz gero aukera gutxiago dago ondo ibiltzeko. Lana, familia, entrenatzeko ordua ezin bateratu… Pentsa, polearekin entrenatzen dugu jende nahikorik ez daukagulako bi talde elkarren kontra tiraka jartzeko. Oinarri on bat egiteko zailtasunak ditugu eta gero lehiaketetan nabaritu egiten da teknika edo freskotasun hori falta zaigula”, azpimarratu dute Mutrikuko kideek. Hala ere, astean bospasei aldiz entrenatzen dute eta taldeko entrenamenduak astearte, ostegun eta asteburuetan egiten dituzte: “Gogortasuna badu, momenturen batean tira, eutsi eta sufritu. Halere, kirola egiten nork ez du sufritzen konpetizioetan? Gorputza prestatzeko modu bat da sokatira”, ohartarazi du Iker Goikoetxeak. Ekinean jarraituko dute, tiraldiz tiraldi, gustatzen zaielako eta 2020an Munduko Txapelketa Getxon jokatuko delako: “Motibazioa eta ilusioa sortzen digu. Horra ahalik eta ondoen iristea da asmoa herri kirol ekitaldi handi bat delako eta eskaparate polita delako. Aprobetxatu egin behar dugu”