Zilarra Bartzelonan
“Munduko txapelketan bizitakoa gordeta geratuko da, baina finala galdu izanaren arantza daukat ez nuelako nire maila ematerik izan”
E15-4 eta 15-4 galdu zuen Bartzelonan: “Mundialeko finalean dena aldrebes atera zitzaidan eta ez nintzen gustura aritu, Ducassou berriz primeran”
sperientzia “ederra” izan da Kataluniakoa Eneko Maizentzat (Billabona, 1996). Munduko azpitxapeldun geratu da trinketean, Battitte Ducassou Iparraldeko pilotariaren aurka 15-4 eta 15-4ko emaitzaz galduta: “Iaz 22 urtez azpiko mundiala jokatu nuen eta aurten maila absolutuan jende berria eta hobea topatu dut. Bizitakoa gordeta geratuko da, baina finala galdu izanaren arantzarekin”, onartu du.
Behin horraino iritsia irabaztea izaten baita nahia: “Selekzio frantziarrarekin bost profesional zeuden eta irabaztea oso zaila zela bagenekien, beraz lehenengo helburua finalera iristea zen”, adierazi du Espainiako federazioarekin aritu den pilotari gazteak. Finalean gauzak “aldrebes” atera zitzaizkion eta aurkariari “dena ondo”. Kantxara irten eta gustura ez geratzeak eman dio pena: “Gerra gehixeago eman nahi nion, baina sakearekin min egin zidan eta ezin izan nuen nire maila eman”.
Ducassou ez zen edonolako aurkaria: “Zirkuituko atzelari hobentsuena da, buruz buru ere asko jokatzen du. Eurak urte guztian aritzen dira eta hemen ez daukagu hainbeste txapelketa. Han onenak onenekin aritzen dira eta mutil konpletoak dira denak”, azaldu du 22 urteko gazteak.
Bartzelonako trinketeak berezitasun bat bazuen, trinkete normalak baino “bi metro luzeagoa” zen: “Indar aldetik gehixeago ziren eta ordaindu egin genuen”, kontatu du billabonatarrak. Harmailetan bildutako jendearen erantzuna ere aparta izan zela gogoratu du, abuzturako amaituta zeuden sarrerak finalaurrekoetarako eta finaletarako: “Gurasoek eta lagun batzuek ezin izan zuten joan, 1.200 sarrerak saldu ziren. Bertako jendea eta kanpokoa batu zen, partida onak jokatu ziren eta jendea gustura geratu zen”
Panpi Ladutxerekin entrenatzen ibili izan da: “Ea Iparraldetik deitzen nauten berriro udara aldean trinketeko partidak jokatzeko”
Ezker paretarekin alderatuta: “Trinketean jokoa eskuinez egiten da gehienbat, ezkerreko teilatua eta sarea bilatzea delako helburua”