Etenak soilik geldiarazi ditu
Eta Bidasoa XXIko emakumezko waterpoloko taldeak Euskal Herriko ligaren eta koparekin egin dira; maila igotzeko aukera du behar duen dirua lortzen badu hurrengo hilabetetan
Bidasoa XXI waterpolo taldeak garaipen bikoitza eskuratu du aurtengo sasoian. Euskal Herriko ligaren eta koparen jabe egin da, eta mailaz igotzeko aukera du hala. Taldeko atezaina da Nerea Mitxelena: “Oso denboraldi ona egin dugu”.
Suziria nola, etenik gabe koskak igotzen aritu da sasoi honetan Bidasoa XXIko emakumezkoen waterpolo taldea. Euskal Herriko koparen jabe egin zen urtarrilean, eta bigarren garaikurra eskuratu berri du orain bi aste, liga bere egin baitu koronabirusaren gaitzak sortutako pandemiaren ondorioz hura bertan-behera utzi eta gero.
Nolanahi ere, etenak soilik geldiarazi ditu irundarrak. Sasoi izugarri ona egiten ari ziren Eduardo Cortezek zuzendutako emakumeak, partida alerik galdu gabe osatu baitute txapelketa nagusia. Nerea Mitxelena taldeko atezainaren esanetan, “oso denboraldi ona egin dugu. Pena ematen digu liga ez amaitzeak eta Espainiako Txapelketa ez jokatzeak, baina mailaz igotzeko aukera eman digute eta pozik gaude alde horretatik”.
Izan ere, datorren urtean nazional deituriko mailan aritzeko atea zabaldu zaie Mitxelenari eta haren taldekideei, eta urrats hori egiteko lanean ari dira orain: “Gogotsu gaude. Aurrekontuei begira gaude, ea igotzeko dirua lortzen dugun. Zuzendaritza batzordea han-hemenka ari da, babesleak eta dirulaguntzak bilatzen. Lortuko dugula uste dut”.
Hala balitz, Gipuzkoako lehendabiziko kluba izango litzateke halako zerbait lortzen. Liga eta kopa irabazteak “asko” esan nahi du Mitxelenarentzat. Azaldu duenez, azken urteetan aldaketa asko izan dituzte taldean, eta jendearen joan-etorriak ohikoak izan dira: “Esfortzu handia eskatzen duen kirola da. Igerilekuak itxi ostean entrenatzen dugu, sarri gaueko hamaiketan amaituta… Horregatik, harro gaude lortu dugunaz” ●