Bona Pasqua a tuc

Bona Pasqua a quii che ha perdü la memoria, a quii che i ga la cürta e anca a quii che i fa paré … …alora, tant par fag vignì ’n ment:

bona Pasqua a quii che sa regorda più che un poo (anca se i è tanti) da ann fa, favum al fen, navum a fa legn e strepavum sü i sciücc, vangavum, piantavum e tiravum sü i patati, favum la vigna e ga davum su l’acqua, favum al vin, al vinel, al turciadig e… la grapa (cun la flema). Tegnevum (la grapa) quela püsee alta da gradi… sa sa mai, di volt pan maa, navum a tö l’acqua a la funtana, piantavum, catavum e spuiavum al carlun, navum a catà sü castegn (cun la tascheta): mangiavum i mundel, i frü, i staiadig e anca quii da la grà, che pö i serviva anca par biasà e fa sariva… la ga vureva par firà la lana di pegur, cüravum i vacc, i mungevum (da part però) e i purtavum al manz, cüravum i cavar, i mungevum (da drè però) e favum i furmagin (mia par vendai), netavum sü la stala e portavum fö ‘l ledam; l’inmügiavum par pö spantegal, navum tö l’acqua a la funtana.

I donn i nava a fa fac e mia par tirà noc, i nava a làvà i pagn in da la rungia o a la funtana. Ta sa regordat… lavà, resentà e supresà… e anca ciciarà.

Bona Pasqua anca a quii che i pagava cul libret da la Cuperativa, bona Pasqua a quii che ga mancava sempru i bulin, bona Pasqua al pan fresch da quarantott or.

Bona Pasqua a quii che sa ciamava bechee, becarlel, panetee, materazee, gelatee, teciatt, (...)

Segue a pagina 26