I vutaziun

Amico mio, sé tan disat di vutaziun?

Se vöt che ta disa… mi ò vinciü! E guardum mia maa… al so già quel che ta vörat dim. L’è quel che ma domandi anca mi. Ma quand che nem a vutà, a votum sempru quel che capisum o quel che i ma dis da capì? Mah!

Stavolta, piü o men… insomma mi lu capida inscì.

Quela da l’Europa… Mè vignü ’n ment quii da Bergum de sura:

“E ché l’è la mé cà ché, “E ché comande mé ché, “Oi saì chi à e chi é ché, “(…) so mé ’l padrü…”

Digal a nisun, ma, par quaidun, la sarìa staia anca l’ucasiun – anca perché ogni tant san parla – da guardag adré ala Bionda Aurora…

Quela da l’asicuraziun… ta sa regordat quand che quel là (fem mia da nom) al nava in ca di maraa par fag firmà la visita. Ogni tanto un quai vun al sa trovava mia; l’evo in gir par ciapà na bucada d’aria, inscì almeno al diseva, n’aria che, mia sempru, ma ogni tant, l’eva quela mia dal terz, mia dal quart ma da quel che vegn dopu.

Quela di corni… Ta sa regordat quand a metà d’una quai matina dal mes da lüi, sa senteva quel tec, tec, tec? I eva dré martelà la ranza e li tacaa, sfilza giò ’n dal pra ’l cudee, cun denta la cod che la serviva par cudà la ranza. Se l’eva ’l cudee? Al cornu d’una vaca!

E lora? E lora mi ò vinciü!