Dam a trà … dagh mia trà!

amico mio, devi cüntat sü na sturiela. Lo mia inventada mi, ma al scior Kierkegaard che ’l vegneva da la Danimarca. Ti tal cugnosat mia, ma fa nagot. L’eva un filosofo che ogni tant al cüntava sü na quai storia par fag capì ai gent quel che anca mi e tì avarium mia capii. Scolta.

na volta gheva un giglio che l’eva cresü visin a na rungia, in mez a i urtig e ’n quai fioo, fioo qualsiasi, quii che cata nisün, senza nom. al giglio l’eva cuntent. L’acqua l’eva fresca, l’aria l’eva bona. Se ta vö püsee?

nagot, finché è rivaa scià quel’üselin. al pasa na volta, al torna ’n dré, al guarda ’l giglio e ’l scorla ’l co… se fet lì! L’è mia ’l to post. Ta stariat ben in d’un bel giardin, ’n duva tüc i fioo iè bei, bei cumè ti.

Lasa perd, al sa diseva in tra da lü, al giglio. Ma l’üselin al mulava mia. L’è mia ’l to post, finché ta stee lì, ta saree nisun e ti ta meritat püsee.

E a dasi dasi, al giglio la cuminciaa sentì cumè ’n grop, na vöia da dì ‘al ga resun’, ‘se foo chinscì?’ ‘Speti ’l mument, prima da piegà ’l co e pö da bürlà là’. ’Scià che prövum’… e la pruvaa…

… l’üselin-busard, ciciarun, ganasa, anca catiiv, cuntent da vedel pü sudisfaa, cul fidig al post dal cör e i pulmun che i nava a stantüf, la ciapaa ’l bec e al la strepaa.

che maa! Porca… no, un giglio al bestema mia, ma ’l pensa: ‘l’è nagot. Ga vöö un poo da quel brut par veg tantu da quel bel’. Ma ’n da la vöia e cun la brama da ves “püsee” (l’eva ora!) a ghé pü vignüü ’n ment che ’n fioo quant che tal strepat, prima ’l pasis e pö ’l seca. E ’n sci lè stai.

E lora?

E lora, amico mio, demig mia trà a quii che i ta met ados quela vöia da ves püsee, sempru püsee. Quii che i ta met ados quel malcuntent, quel quiecos che ta lasa mia tranquil, che ’l ta fa guardà da l’altra part da la strada, che ’l ta fa levà sü cun la vöia da sta ’n lett. che quel che ta fee ti l’è nagot a cunfrunt da quel che fa quel’altru. E che ta podariat fa anca ti, anzi püsee ben.

amico mio, cerchem da ves cuntent da quel che sem. E regurdemas che l’è sempru mei na fö dalla porta che salta gio da la finestra.