Ghem i candidati …

Amico mio, sem a post. I nom i ghé. Sia par al Consiglio da Stat, sia par al Gran Cunsigliu. Né mi né ti ga sem denta. Dunca podum vutà quel e chi che vörüm. E senza dumandag nagot a nisün, ma püsee da tutt senza duvè di né grazie né prego. Che l’è già na bela roba. A part sta “sbrufada” se tan disat?

Ma! … mi i cugnosi mia tüc e qui poc che cugnosi lè par vei sentii numinà. Sent, mi i ma insegnaa che par na sü in quei post lì bisögna prima da tutt partecipà, fa quiecoss. Mia sta sü a scaldà la cadrega, guardà in gir, ‘lavurà’ cul PC, ma intervignì, anca intüì, cercà i suluziun, e mia sempru di da sì o da no parché ’l la dii quel là o parché quiii da la nosa part i dev fa ‘inscì! Bisögna mia veg pagüra da sbaglià. Mia veg pagüra da quel che pensa queschì e quel che disarà quel là.

Cert che ga vö quel ambient (ciamemal inscì) mia dumà che ta permeta, ma che ta faga vignì vöia da fa queicoss, magari anca da nöf. Mia sempru dag a trà a quel là che ’l sa sempru tütt. Dumandà l’è giüst, anzi. Stag atent però: gl’infurmaziun i è necesari. Mia trop però… i finis da scunfundat. A proposit d’infurmaziun, tè mai pensaa che quei sü là i duvaria vess un poo püsee curios?

E parché?

Parché go l’impressiun che mia sempru sa sà quel che süced in da la vita di altri. Mia sempre sa sa dumanda quel che pensa i altri, quei cumé mi e ti, quel che fem, e quel che fem mia. E perché ’l fem o ’l fem mia, o ’l fem malvulentera. Guardà denta in di cà… “fal ti però e dag mia sempru a tra a quel la che ’l ta dis: lu già fai mi”… Na gio ’n piazza e scultà… in mez a tanti bal salta sempre föra na quai verità. Magari queicoss che i ta mia dii par mia fat sta ’n pensee o, pèc anca mò, par mia dat tord. Magari par sentì che quel che tevat fai pensandu da fa ben, la fai l’incuntrari.

Amico mio, ta ghee resun. Che i speta mia trop a ciapà na decisiun, ma però, prima da ciapala che i sa dumanda sempru o quasi sempru: “Parché l’acqua dal mar l’è blö, ma quand ta la metat dent ’na sedela la diventa ciara?”.