Valleamara
Amico mio, se t’an disat da sta vutaziun, che pö, ò mia capii parché i ga tacaa là “consultazione”.
L’è mia parché te mia capii ti che l’è mia na roba giüsta. Lasa perd. A la nosa età l’è già bel se ga la fem a stac adrè… e mia dumà al perché da la “consultazione”.
Ho capii. Nem innanz. Alora, sü quatru, Rögn la dii da no. Melan, Röv e Marogia i a dii da sì... Cuntent lor, content tüc.
Cert che, prima da vutà, ghè stai na bela bataglia da parol. Parol che da föra i fa mia maa, ma da denta quiecoss... Ciamemic “rododentro”!
Mi ’l so mia cusè i na pensaa quii da Rögn, però, insoma, quant che i ta dis: (t’an cünti sü na quai vüna inscì par cas): “Sterili campanilismi”, “notizie false e mezze verità”, “negare l’evidenza”, “nessuna proposta alternativa”, “figli della peggior tradizione”, “non fidatevi di chi dopo aver lanciato il sasso nasconde veloce la mano”.
Ah, però! Adess ta disi mi quiecoss: se i ta disaria “mantenuto”, “ta sa fee cunsiglià da la paranoia”, “rasunà cumè i fiö pinin, quand che i cerca da fat i dispett”?
Senza parlà pö di danee: sü trenta e roti miliun, vün e mezz mia al cumün da Rögn, ma a la müsica che l’è na sucietà a part. Difati i ga respundü: “Mi sum mia al cumün”. Mah!
Finisemalà lì. Vedarem quel che sücedarà. Ta ghe ’n ment quel che sa diseva na volta a San Martin: “l’è dopu la fera che sa cünta i buasc”!