Al capitalismu d’incö e i vutaziun da duman

Amico mio, ta lu già cüntada sü na volta. E dess, se ta fa nagot, ta la ripeti anca mò, anca parché ma par che sem scià, da chi ’n pezzett, cui vutaziun. Difati, ma par che i a cuminciaa a catà föra i list e pö i nom, anzi, prima i nom e pö i list.

Cert che stu maledetu curona al vüta mia...

U capii. Va ben. Però cünta sü sta storia dal “capitalismo”, cumè ta ga ciamat ti. Insoma quel a la bona. Quel che i dis, se l’è vera, che al ma riguarda anca mi e ti... almenu da quel che podum capì, o i ma fa capì.

Scolta: al scior Costantin, che l’eva al padrun al ga dumanda a vün di so uperari: “Alora, se ta votat dumeniga?”... “Al cuntrari da quel che ’l vota lü”... “Ma se ta see mia nanca cusè voti?”... “L’è vera. Però quel che soo, l’è che quel che va ben par lü al va mia ben par mi!”.

Roba d’una volta. Sa vutava o d’una part o da quel’altra, senza guardà tant da fin. O l’è vün di me o vün di so. Incö l’è cambiada.

L’è vera. Incö sa duvaria vutà mia dumà par quel che ta pias püsee, ma par quel che ta sumea che al poda na ben par ti e, sperem, anca par gl’altri, anca se goo un quai dübi. Mah!

Mi inveci goo l’impressiun... ma speri da sbagliam, che incö sa vota cuntra, ripeti cuntra! Pütost che dag al votü a quel lì... o vutà par quii là ... ma nanca! I gavarà anca resun… ogni tant. Na quai idea bona... Però… mai, niet!

Ma, scüsa, adess, cusè ga centra al capitalismu?

Nagot! Però, fa na roba: dumanda ‘n gir, cusè i na pensa da quii che ’n cö i fa sü al vaccino, da quii che i la distribuis e da quii che i la dupera. Parli da quii che sta sü ’n scima e da quii che sta gio ’n fund!

La risposta ta la dò mi: “Par furtüna e sperem in ben…!”.

Amico mio, scià che la finisum cui vutaziun. Sperem che quii che narà sü i sa regorda che ga sem anca nüm… nüm che stem gio!