Dirgelwch Dolwen – 35 Diwrnod yn dychwelyd
MAE cyfrinachau a chelwyddau yn dod i’r wyneb wrth i frodyr a chwiorydd ddod ynghyd i daenu llwch eu mam, Mair ac i drafod dyfodol y cartref teuluol. Croeso i Dolwen – hen dŷ mawreddog sy’n lleoliad i’r gyfres newydd o’r ddrama ddirgel 35 Diwrnod.
Dyma’r drydedd gyfres o 35 Diwrnod, sydd wedi ei hysgrifennu gan yr awdures Siwan Jones.
Dros gyfnod o 35 diwrnod, mae tyndra a thristwch chwerw yn datblygu o fewn waliau’r hen ffermdy, sydd yn y pendraw yn arwain at farwolaeth Ifan, brawd ieuenga’r teulu sy’n cael ei chwarae gan yr actor Gwydion Rhys.
Dydi teulu fferm Dolwen ddim wedi bod o dan yr un to ers dathlu pen-blwydd eu diweddar dad Gwyndaf, bum mlynedd ynghynt. Bydd sawl breuddwyd yn chwalu’n deilchion wrth i’r plant amau bod eu hewythr Huw wedi dwyn perswâd ar eu mam i newid ei hewyllys. Wrth iddyn nhw ei herio a mynnu cael y tir yn ôl, mae trais a chenfigen yn taflu cysgod tywyll dros fferm Dolwen.
“Doeddwn i ddim am wybod pwy oedd yn gyfrifol am lofruddio Ifan tan y funud olaf,” meddai Gwydion Rhys, sy’n dod o Felinfach, Bro Preseli ac yn wyneb cyfarwydd ar gyfresi drama fel Tir a Cara Fi. “Weithiau mae ffeindio mas misoedd o flaen llaw yn medru effeithio’r actio. Wrth adael hwn tan y funud olaf, ro’n i wir yn teimlo y gallai unrhyw beth ddigwydd. Fe wnaeth e’n sicr fy nghadw i on edge!”
Yn y drydedd gyfres o’r cynhyrchiad sydd wedi ennill nifer o wobrau BAFTA Cymru, mae’r wynebau cyfarwydd yn cynnwys Ifan Huw Dafydd, Sharon Morgan, Owain Arthur, Gwydion Rhys, Dafydd Hywel, Siân Reese-Williams, Geraint Morgan, Victoria Pugh, Owain Gwynn, Mali Jones, Heledd Gwynn a Gwen Ellis.
35 Diwrnod: S4C, nos Sul 9pm