Llyfr newydd Nadoligaidd i addysgu plant am ffoaduriaid

CYHOEDDIR Cyfrinach Noswyl Nadolig gan Eurgain Haf (Y Lolfa) yn barod at y Nadolig. Yn ogystal â stori hyfryd Nadoligaidd mae i’r gyfrol wers bwysig iawn – sef i fod yn garedig i bawb, o bob cefndir a hil.

Mae Eurgain Haf, sy’n gweithio i’r elusen ryngwladol Achub y Plant, yn aml yn clywed straeon am bobl a phlant yn gorfod gwneud penderfyniadau anodd i adael eu cartrefi a’u gwlad. Nid yw hi’n ddiogel iddyn nhw fyw yno oherwydd gwrthryfel, trais, erledigaeth neu newyn.

Meddai’r awdures: “Roeddwn yn awyddus i ysgrifennu llyfr am ffoadur i godi ymwybyddiaeth o fywydau plant sy’n gorfod ffoi o’u cartrefi ac o’u cymunedau ac annog sgwrs ehangach am beth allwn ni ei wneud i’w helpu. Mae’n bwysig ceisio deall sefyllfaoedd rhai sy’n llai ffodus na ni a dysgu bod yn garedig.”

Yng nghefn y gyfrol mae nodiadau ar gyfer athrawon a rhieni, sy’n cynnig syniadau am rai o’r pethau y gellid eu trafod wrth ddarllen y llyfr.

“Mae gan bob plentyn yr hawl i deimlo’n ddiogel ac i gael ei amddiffyn. Mae gan bob plentyn yr hawl i gael addysg – ac i fod yn blentyn. Nid yw’r pethau yma’n hawliau naturiol yn rhai o wledydd y byd,” meddai Eurgain.

Ar draws y byd mae tua 26 miliwn o ffoaduriaid, ac mae eu hanner nhw yn blant.

Mae’r rhan fwyaf yn ffoi o wledydd fel Syria, Affganistan, Somalia a De Swdan. Mae nifer yn ffoi ar droed ac yn cerdded am ddyddiau, gan wynebu peryglon enbyd er mwyn cyrraedd gwersylloedd diogel i ffoaduriaid.

Mae rhai ffoaduriaid yn ceisio croesi i wlad arall mewn lori neu ar gwch bychan ac yn aml iawn mae’r daith yn beryg bywyd.

Mae Cyfrinach Noswyl Nadolig yn stori hudol sy’n datgelu bod anifeiliaid medru siarad ar Noswyl Nadolig!

Mae amryw o anifeiliaid caredig, gan gynnwys cath, tylluan wen, ci defaid ac asyn, yn helpu Samir, ffoadur sydd yn cysgu yn y dociau, i gerdded i Fethlehem yng Nghymru, at deulu caredig a fydd yn gofalu ar ei ôl.

Ceir lluniau hyfryd yr artist a’r dylunydd profiadol Sion Morris, sy’n rhoi naws arbennig i’r llyfr. Buodd Eurgain a Sion yn cydweithio ar y llyfr blaenorol, Y Boced Wag a oedd yn ymdrin â mabwysiadu.

Mae Cyfrinach Noswyl Nadolig gan Eurgain Haf ar gael nawr (£5.99, Y Lolfa).