Beachd Ailein
GED NACH E RUD ÙR sam bith a th’ ann gum biodh argamaidean ionmhais aig cridhe dheasbadan phoilitigs, saoilidh mi gum bi sin gu sònraichte fìor anns a’ bhliadhna seo. Chan e a-mhàin gum bheil taghaidhean Phàrlamaid na h-Alba a’ tighinn ann am beagan mhìosan ach tha buaidh ghearraidhean a th’ air a bhith a’ tachairt thar bhliadhnaichean a sìor thoirt buaidh air beatha làitheil a’ mhòr-shluaigh agus tha an-fhois an cois sin. Ann an Alba tha an co- chòrdadh a steidhich Riaghaltas Nàiseantach le Co-chruinneachadh Ughdarrasan Ionadail na h-Alba ann an 2008 a’ leantainn, agus tha sin a-nise na thrioblaid mhòr dha Comhairlean na dùthcha le seirbheisean gan lùghdachadh agus cosnaidhean gan call. Ged a tha an Riaghaltas ag argamaid gum bheil an casg air àrdachadh ann an Cìsean Comhairle na chuideachadh dha na h-uile feadh na dùthcha, tha fianais làidir ann cuideachd gur iad na daoine as miosa dheth as lugha a tha a’ buannachadh. Chan eil teagamh nach eil am poileasaidh seo agus leithid chungaidhean-leigheis an-asgaidh gu bhith tarraingeach dha luchd-bhòtaidh, agus chan iongnadh ged a bhiodh pàrtaidhean poilitigeach dùbhlanach a’ fàgail air an Riaghaltas Nàiseantach gur ann a’ suirghe taic phoilitigeach a tha iad seach a bhith ag amas air co-ionannachd cothroim is solarachaidh dhan t- sluagh.
Ge b’ e dè tha fìor bho gach taobh den argamaid sin, tha cunntasan-bheachd a’ dèanamh fàisneachd gun soirbhich am Pàrtaidh Nàiseanta a-rithist ann an taghaidhean na bliadhna seo. Saoilidh mòran gum bheil eòlas nan ughdarrasan ionadail a’ dearbhadh nach eil na poileasaidhean co-ionannachd aig Riaghaltas na h-Alba idir a’ coileanadh am prìomh amais, agus aig àm far am bheil ionmhas poblach cho teann gum bheil feum air lasachadh a thoirt gun dàil air a chuingealachadh air Cìsean Comhairle. Cha ghabh an soitheach Gàidhealach ach a làn their an seanfhacal, agus tha fhios gum bheil e cuideachd fìor nach urrainnear a bhith a sìor lùghdachadh bhuidseatan sheirbheisean poblach gun an fheadhainn a tha an eisimeil nan sochairean sin fulang ri linn. ‘S e carachd inntinneach dheamocratach a th’ ann ach chan eil e na annas gum bheil cuid de Chomhairlean a-nise a’ bagairt na Cìsean a chur suas a dh’aindeoin ‘s ged a rachadh càin orra bhon Riaghaltas. Tha Comhairle na Gàidhealtachd air aontachadh cothrom a thoirt dha luchd- obrach, is oifigich aig àrd-ìre nam measg, an obraichean fhàgail tràth gus cuideachadh leis a’ Chomhairle a cuid chosgaisean a chothromachadh.
Chan iongnadh gum bheil luchdobrach eile a-nise fo iomagain ach cò air a thig na dleastanasan a thèid fhàgail bàn nuair a dh’fhalbhas na daoine sin!
IT IS not surprising that staff at Highland Council are concerned at potentially increased workloads if hundreds of colleagues take voluntary redundancy. Continuous budget cutting obviously reduces services and it is surprising that councils have not abandoned their 2008 Council Tax Freeze Accord with Scottish Government before now. An interesting democratic joust, but the outcome could be a matter of life or death for some people.