Beachd Ailein
THA MISE ag aontachadh gu tur leis a’ bheachd nach eil còir dhan Ghàidhlig a bhith air a ceangal ri nàiseantachd na h-Alba neo gu dearbh dùthaich sam bith eile.
Gu dearbh thèid mise nas fhaide na sin oir tha mi a’ creidsinn nach buin Gàidhlig dha pàrtaidh poilitigeach sam bith ach gum bheil còir aca uile uallach a ghabhail air a son!
Faisg air dà fhichead bliadhna air ais bha mi fhìn is Iain Noble aig coinneimh le prìomh fhear-gnothaich Albannach nuair a nochd ceist mun Ghàidhlig anns a’ chòmhradh.
’S gann a chreidinn e nuair a thuirt an duine sin nach b’ urrainn dhàsan taic a thoirt dhan Ghàidhlig air sgàth ’s nach robh e airson Alba a’ sgaradh bhon Rìoghachd Aonaichte.
B’ e seo a’ chiad turas a choinnich mise ris a’ bheachd gun robh Gàidhlig na cuid de dh’iomairt nàiseantachd ann an Alba.
Tha mi a’ creidsinn agus air a ràdh iomadh uair bhon uairsin gur e ceum cho cudromach is a thachair dhan chànan gun deach againn air a dearbhadh mar phàirt dheatamach de dhualchas nàiseanta na h-Alba. Gun teagamh buinidh i dhan t-sluagh a tha ga dìon agus ga cleachdadh ach tha mise agus mòran eile a’ creidsinn gum bheil e mar dhleastanas aig an dùthaich gu lèir leithid seo de dhualchas chultarail a ghleidheadh.
Ged a tha Gàidhlig a’ tighinn mar dhìleab air Gàidheil na dùthcha seo, tha àireamhan chunntasan- sluaigh is eile a’ nochdadh gun robh mòran air an tiodhlac sin àicheadh.
Gu fortanach, agus ri linn iomadh iomairt leasachaidh eadar- dhealaichte, tha ginealaichean ùra a’ tilleadh chun an dualchas agus tha cuideachd mòran ag ionnsachadh a’ chànain aig nach robh ceangal teaghlaich sam bith ri Gàidhlig.
Mar a tha fios aig a’ mhòr- chuid de luchd-taice a’ chànain, tha astar mòr ri shiubhal fhathast mu ruig Gàidhlig ìre thèarainte, ach nuair a chaidh Achd na Gàidhlig aontachadh ann am Pàrlamaid na h-Alba air 21 An Giblean 2005, bha làn-aonta eadar gach Pàrtaidh a thaobh a bhith a’ dìon is a’ leasachadh a’ chànain.
Sin mar bu chòir a bhith cuideachd, ach gu mì-fhortanach agus a dh’aindeoin gach gealladh air saoghal ùr toinisgeil nan cuid giùlain, tha luchd-poilitigs ro dheiseil slaiceadh air pàrtaidhean a chèile agus rud sam bith a chleachdadh mar bhallairm anns a’ bhuamastaireachd sin!
Nach bochd gum bheil cho beag mothachaidh aig cuid a Bhuill anns gach Pàrlamaid, air na geallaidhean a chaidh a thoirt beagan is deich bliadhna air ais!
ONE OF the most important steps in Gaelic development was making it clear this language is a valuable part of Scotland’s national heritage and that consequently ALL political parties have a responsibility for its survival and development.
There was cross-party unanimity when the Gaelic Language (Scotland) Act was passed in the Scottish Parliament on April 21, 2005 and it is unfortunate to find some MSPs now quite wrongly labelling Gaelic as a unique element of nationalism.