Beachd Ailein
THA MI A’ SGRÌOBHADH aig deireadh seachdaine a bha buannachdail agus na toileachas dha dà bhuidheann àraid agus nach math a bhith a’ fianais chùisean soirbheachail!
Ged a rinn cuid den luchd-taice aig an sgioba masladh dhiubh fhèin an dèidh a’ gheama, nach bu shònraichte gun do bhuinnig Hibs Cupa na h-Alba an dèidh strì ceud is ceithir bliadhna deug!
Meal-a-naidheachd orra uile a bha an sàs aig dà sgioba a rinn deagh fharpais agus a thug toileachas dha luchd-amharc feadh na dùthcha. Cha chuir dad smal air aoibhneas stiùirichean agus sgioba Hibs ach tha e tàmailteach da-rìribh gun deach latha a bha cho sònraichte dhaibh a mhilleadh le mì-mhodh, agus bithear an dòchas gun tèid leasanan ionnsachadh às na thachair aig Pàirc Hampden an dèidh làimhe.
’S iomadh facal a chaidh a labhairt is a sgrìobhadh mun chuspair bho thòisich Calmac agus Serco a’ deasachadh an tairgsean fa leth airson seirbheis aiseig Chluaidh agus Innse Gall a lìbhrigeadh. Bho thoiseach cùise bha eas-aonta ann a thaobh co- dhiù bha Riaghaltas na h-Alba ceart a’ chùmhnant seo a chur gu farpais fhosgailte, agus Diardaoin seo chaidh bha an t-aonadh RMT a’ togail fianais an aghaidh leithid de sheirbheis a leigeil dhan roinn phrìobhaidich.
Chaidh gath an fhianais sin a tharraing beagan nuair a dh’fhoillsich Prìomh Mhinistear na h-Alba, air an dearbh mhadainn, gun robh Calmac air a’ chùmhnant a ghleidheadh.
Chaidh fàilte bhlàth a chur air an naidheachd seo far feadh na dùthcha, agus gu sònraichte anns na sgìrean sam bheil beatha làitheil na coimhearsnachd an eisimeil nan aiseagan a tha gam frithealadh. Saoilidh mi gum faodar a bhith cinnteach gun do gheall an tagradh aig CalMac gum biodh a’ bhuidheann dealasach ann a bhith a’ leasachadh sheirbheisean ma choinneimh iarrtasan a tha daonnan ag atharrachadh, agus gun amais a’ bhuidheann air na seirbheisean sin a lìbhrigeadh gu h- èifeachdach agus gu gnothachail. Choisinn bàtaichean Mhic a’ Bhruthainn agus an cuid sgiobaidhean cliù nach beag thar iomadh bliadhna, ach mar a bhiodh dùil agus mar a tha iarrtasan air ìre nan seirbheisean a’ fàs, tha gearainean a’ nochdadh cuideachd.
Tuigear trioblaid dhuilgheadasan teicnigeach agus mar a dh’fheumar bàtaichean a ghluasad gus seirbheisean a chumail a’ dol. Chan eil de shoithichean aig Calmac airson gluasadan den t-seòrsa a sheachnadh, agus le co- dhiù seirbheis chòig bliadhna fichead ga shùileachadh às gach bàta, tha dùbhlain daonnan gu bhith romhpa. A rèir seanfhacail ’s e goirteas a chinn fhèin as dorra do gach neach, agus tha amharas agam gum bi cinn ghoirt gu leòr ro stiùirichean Chalmac thar nam bliadhnaichean romhainn! TWO PARTICULARLY GOOD stories as I write this.
Congratulations to Hibs on their historic success in the Scottish Cup! Let’s hope the post-match Hampden trouble will not spoil memories of their achievement.
News that CalMac has won an eight-year Clyde and Hebrides Ferry Services contract is most welcome, but while congratulating them on this success I feel sure the company will face many challenges in meeting customer aspirations. Ailean Caimbeul (Allan Campbell) ailean@obantimes.co.uk