Beachd Ailein
BLIADHNA MHATH ÙR dhuibh uile agus mòran dhiubh!
‘S iomadh rud a b’ fheàrr leam fhaicinn na Ameireagaidh is an Ruis a’ maoidheadh air càch a chèile às ùr, agus ged ‘s fhurasta a thuigsinn carson a bhiodh Barak Obama mì-thoilichte ma tha dearbhadh aige gun robh an Ruis a’ feuchainn ri buaidh a thoirt air taghaidhean Chinn-suidhe Ameireagaidh, tha e doirbh fhaicinn dè am feum a tha e a’ dèanamh le bhith a’ cruthachadh sgaraidhean dioplòmasach ‘s gun aige ach beagan sheachdainean air fhàgail na dhreuchd. Tha e a’ toirt cothrom dha Trump e fhèin a nochdadh mar ghleustair eadar-nàiseanta, gu cinnteach ìomhaigh nach do choisinn e gu ruige seo, nuair a ghabhas esan thairis agus a nì e aonta ùr le Putin agus an Ruis.
‘S dòcha gun robh cuid agaibh mar a bha sinne a’ cur seachad ùine laghach cuide ri oghaichean thairis air àm Nollaige agus suas chun na Bliadhn’ Ùire, agus dh’fheumamaid greis a thoirt a’ cluiche caochladh gheamannan cuide riutha. Bha aon ghèam a fhuair an òigridh againne a bha ag adhbharachadh fìor spòrs, agus b’ e sin fear anns am bheil gach cluicheadair a’ cur frèam plastaig nam beul a tha a’ cumail an lipean bho chèile is iad a’ leughadh fhaclan feuch an tuig buill eile an sgioba aca dè tha iad ag ràdh. Chun am feuchar e ‘s gann a chreideas tu cho doirbh ‘s a tha cuid a dh’fhaclan aithris nuair nach eil comas agad do bheul a dhùnadh anns an dòigh àbhaisteach, agus gu dearbh tha cuid de fhuaimean air nach amais thu idir! Aig an aon àm, agus gu h-iongantach, mar a bu trice bha sinn ga chluich ‘s ann a b’ fheàrr a bha sinn a’ tòiseachadh ri càch a chèile a thuigsinn, car mar gun robh sinn ag ionnsachadh cànan ùr.
Bhuail e orm gum bu mhath nan amaiseadh luchd-poilitigs an t-saoghail air èisteachd nas dùrachdaiche ri càch a chèile anns a’ bhliadhna ùr seo ach an tòisicheadh iad ri rùintean a chèile a thuigsinn. Bhiodh leithid de thuigse na bhunait airson an tuilleadh deasbaid air mar a b’ fheàrr cùisean an t-saoghail a ghluasad air adhart ann an dòigh a bhiodh sìtheil agus buannachdail dhan chruinne- cè. Cha chreid mi nach e sin mo phrìomh dhùrachd dhan t-saoghal bho thoiseach 2017 air adhart, agus ged ‘s dòcha a chanas cuid gur e amas gun dòchas a th’ ann, saoilidh mi mar a bi amas againn a dh’ionnsaigh co-luadar sìtheil tha fios is cinnt nach tachair e! A GAME WE ENJOYED with grandchildren over the festive period involved attempting to identify words spoken by a competitor wearing a plastic frame in their mouth which prevented normal enunciation. Great fun, and it was surprising how quickly we became accustomed to new sounds and learned to understand them.
For 2017 and forwards I wish that world leaders might listen, understand, and cooperate in the best interests of mankind and his environment!