Beachd Ailein
DIARDAOIN SEO CHAIDH chaidh tagradh le còrr air dà cheud mìle ainm a shìneadh dha oifigich aig Sràid Downing ag iarraidh urram a bhuileachadh air Seòras MacIain an aon bhall a th’ air fhàgail beò de Sguadran 617 nam Dam Busters a sgrios trì damaichean anns a’ Ghearmailt air an 17 Cèitean 1943.
Bha e cho doirbh ionnsaigh a thoirt aig Möhne, Eder agus Sorpe ri linn talamh àrd is gun deach am ‘boma bocadaich – bouncing bomb’ aig Barnes Wallis a leasachadh airson feuchainn orra.
Tha eachdraidh a’ dearbhadh mar a shoirbhich leis an ionnsaigh, agus a’ ghaisge aig daoine òga a’ coileanadh ruathar-adhair an aghaidh brasshruth urchair bho ghunnaichean dìon.
Ach bu daor a cheannaich Sguadran 617 na bhuinnig iad is faisg air leth nan itealan agus caogad ‘s a trì duine air an call.
Chaidh urram Crois Bhictoria a bhuileachadh air Guy Gibson, ceannsalach an Sguadrain, ach ged a dhearbh Barnes Wallis a chuid ealantachd leis a’ bhoma bocadaich, bha a chuid toileachais à sin air a mhilleadh gu mòr le aithne air na chaill am beathannan anns an ionnsaigh.
Saoilidh mi gum bheil e ceart gun tèid gaisge ann an cogadh, agus gu sònraichte aig àm sìthe, aithneachadh gu poblach agus ma tha creideas gu bhith aig siostam urraman na dùthcha seo, tha fhios gum bheil Seòras MacIain airidh air aithne.
Aig an aon àm chanadh mòran le làn- cheartas gun robh mìltean a nochd gaisge ann an cogaidhean nach d’ fhuair aithne, ‘s dòcha gun robh an àireamh ro mhòr dhan t-siostam.
Tha MacIain ceart le bhith ag ràdh gum bi dad sam bith a thèid a bhuileachadh airsan na urram dhan a h-uile neach a thug seirbheis ann an Sguadran 617.
Thug seo orm fhìn smaoineachadh às ùr air cho beag còmhraidh ‘s a dhèanadh leithid m’ athair air na chunnaic is na dh’fhuiling e sa chogadh, agus tha fhios gum bheil iomadach teaghlach eile aig am bheil an aon fhianais.
Ach tha mise air tighinn chun a’ cho-dhùnaidh gur e bu choireach dhan t-sàmhchair sin gun robh daoine a’ feuchainn ris na chunnaic, na dh’fhuiling, is na rinn iad a chur às an cuimhne.
Mar eisimpleir, aon iomradh air comhailteachd iargalta dhan Ruis aig àm an Dàrna Cogaidh a chuala mi bhom athair, sealladh a tha fios agam a mhair leis fad a bheatha, b ’e sin uamhas a bhith a’ seòladh tancair tro mhuir a bha na teine le ola shoithich a chaidh a cur fodha is e a’ faicinn ‘s a’ cluinntinn dhaoine anns an uisge nach b’ urrainn dha a chuideachadh. Cha b’ iongnadh leithid a chuimhne na trom-laighe!
LAST THURSDAY a 200,000-signature petition was submitted to Downing Street asking that 95-yearold George Johnson, the last survivor of the 1943 617 Squadron Dam Buster raids, be honoured.
I believe he should, because Johnson has stated that any honour he receives will be for his squadron and former colleagues.