Beachd Ailein
SAOILIDH MI GUM BHEIL mìosan bho cheannaich mi sìol- cura a’ bhuntàta agus bidh e math fhaotainn dhan talamh mu dheireadh thall. Ged a bha an aimsir cuimseach math bha an talamh fliuch agus fuar gu ruige seo, agus gu dearbh tha luchd na h-aimsire a’ fàidheadaireachd tuilleadh fuachd agus theagamh reothadh an t-seachdain seo fhèin.
Ach chan urrainn gum bheil earrach fada às is a’ chuthag gu bhith a’ gairm ann am beagan làithean ‘s an Cèitean gu bhith againn.
Bidh na h-oghaichean aig mo charaid Iain Ùisdean còmhla rinn aig a’ bhuntàta agus bidh mi tric a’ beachdachadh air cho buannachdail ‘s a bha na dh’ionnsaich sinne uile a thogadh air an tuath. Fhuair sinn eòlas air an àrainneachd agus air nàdar nach robh aig clann nam bailtean-mòra agus ged is dòcha nach do thuig sinn sin aig an àm, thug am fiosrachadh sin tuigse luachmhor dhuinn.
‘S iomadh sgeul a chluinnear mu dhaoine òga agus inbhich aig nach eil cus tuigse air cò às a tha mòran de na tha iad ag ithe a’ tighinn, agus tha cuimhn’ agam turas ag iarraidh trosg slàn ann am bùth- èisg is fear na bùtha ag ràdh rium nach biodh fhios aig a’ mhòr- chuid den luchd- ceannach dè dhèanadh iad le iasg slàn.
Bhiodh m’ athair tric ag ràdh nach bu chòir gum fuilingeadh sluagh na dùthcha fìor bhochdainn fhad ’s a bhiodh iasg sa mhuir is maorach air tràigh, agus gun robh iad mar sin fortanach seach muinntir nam bailtean-mòra.
Nach math a-nise a bhith a’ faicinn teicneòlas ga chleachdadh barrachd is barrachd gus foghlam cloinne a leudachadh le dealbhan beò gam biathadh bho thuathan gu ruige seòmraichean sgoile, agus clann a’ faicinn uain gam breith is mar sin air adhart.
Theagamh gum bi greis mun ruig an seòrsa innleachd sin a h-uile sgoil ach chan eil teagamh nach cuir leithid de dh’eòlas ri tuigse nan ginealaichean a tha romhainn air luach na h-àrainneachd agus carson a tha e cudromach a dìon. Bu chòir dha bhith na amas gum bi a h-uile neach a’ gabhail cùram mun t-saoghal mun cuairt dhaibh. Ach mar a thuirt caraid dhomh uair is e an sàs ann an deasbad mun Ghàidhlig, tha fhios againn uile gum bheil daoine co-ionann ge b’ e dè an dath a dh’fhaodas a bhith orra ach tha feum air laghan gus an ceartas sin a ghleidheadh. Chan eil teagamh nach eil burraidheachd nàdarra ann an gnè mhic an duine mar a tha e ann an ainmhidhean eile, agus bidh feum daonnan air laghan a bheir dìon dha còraichean mion- choimhearsnachdan leithid tè na Gàidhlig!
THOSE of us raised on crofts benefited hugely from what we learned of nature and I was delighted to see technology now being used to stream live pictures from farms into schools to enhance children’s understanding. It may take time to establish such links everywhere but there can be no doubt that such education will help future environmental care.