Beachd Ailein
AN RUD A CHÌ LEANABH, ‘s e nì leanabh! Bha dà thachartas bho chionn ghoirid a thug an seanfhacal air leth fìor seo nam chuimhne.
‘S fhada bho thuig mac an duine an cumhachd a bh’ aig foillseachadh, agus thar iomadach bliadhna bha gnìomhachas an tombaca ealanta na chuid margaideachd, a’ cosnadh cumhachd agus fortain mhòra dhan fheadhainn a bha an sàs ann.
Ach bho chionn beagan bhliadhnaichean tha luchd-iomairt air adhartas nach beag a dhèanamh nan oidhirp gus casg a chur air smocadh, agus anns a’ ghluasad as ùire feumaidh toitean a bhith air an tabhann anns an aon sheòrsa pacaid le rabhaidhean cruaidhe a thaobh cunnart slàinte. Deagh chomhairle an sin ma-tà. An tachartas eile a thog m’ aire ‘s e gun deach cuimhneachain Confederalach an leagail ann am baile New Orleans ann an Ameireagaidh. Cha b’ ann gun spàirn a bhuadhaich ceannard a’ bhaile le seo, ach an dèidh còrr air dà cheud bliadhna tha ìomhaighean a bha a’ comharrachadh tràillealachd agus fulang dhaoine dubha air a dhol à sealladh.
Abair cuirm ciùil shònraichte ann an Taigh- cluiche Cùirt Eden an Inbhir Nis Dihaoine seo chaidh is an còmhlan Skipinnish a’ cur a’ chlàir ùir aca air bhog gu h- oifigeil. Mealaibh bhur naidheachd fhearaibh, agus Raonaid Walker, airson feasgar a bha cho taitneach agus gach soirbheachadh le The Seventh Wave (An Seachdamh Tonn).
Saoilidh mi gum bheil freumhan ciùil Skipinnish air am biathadh à dualchas na Gàidhlig agus na Gàidhealtachd agus nach ann dhuinn uile a thigeadh a bhith moiteil à mar a tha ceòl Gàidhlig agus Gàidhealach air inbhe agus cliù eadar-nàiseanta a chosnadh thar nan deicheadan bhliadhnaichean a chaidh.
Sàr luchd- ealain a’ sìor thogail air bunaitean a leag Runrig ceathrad ‘s a ceithir bliadhna air ais agus a tha iad fhèin air a ghleidheadh cuideachd. Chan eil teagamh nach eil an seòrsa ciùil seo a’ cuideachadh anns an iomairt gus suidheachadh na Gàidhlig a neartachadh às ùr, agus tha gach foillseachadh clàir agus gach cuirm anns am bheil an ceòl ri chluinntinn na bhrosnachadh cudromach dhan chànan is dhan dualchas. Faodaidh mòran nach eil a’ cleachdadh a’ chànain a bhith air am misneachadh tòiseachadh ri sin a dhèanamh a-rithist, agus faodaidh cuideachd feadhainn eile a bhith air an tàladh gus an cànan ionnsachadh.
‘S fhiach aithneachadh a’ mhargaideachd air leth luachmhor a tha an luchd-ciùil sin uile a’ dèanamh dhan chànan, agus an cothrom sònraichte a th’ aca cur ri inbhe an dualchais le bhith a’ cleachdadh beagan Gàidhlig air na h-àird- ùrlair. THE YOUNG OF ALL species learn from the example of adults so the standardisation of tobacco packaging in the UK is a welcome step towards discouraging smoking and preventing costly illness. In America, the removal of New Orleans’ Confederate memorials signifying white supremacy and a belief in slavery, deliver an equally significant and welcome message.
Congratulations to Skipinnish on the launch of its latest album The Seventh
Wave, and for its positive promotion of Gaelic language and culture.