Aithne is inbhe
A RÈIR BHEACHDAN dhaoine ris an do bhruidhinn mi Disathairne seo chaidh, agus bhon uairsin, chòrd Mòd Nàiseanta Rìoghail 2017 ann an Gearasdan Loch Abar fìor mhath ris an fheadhainn a bha an làthair agus riuthasan a bha ga èisteachd air rèidio agus telebhisean.
Tha mi air leth toilichte leis a’ bhreith sin air sgàth an dà chuid, buidhnean-taice agus na daoine a dh’obraich cho cruaidh gus a thoirt gu buil, agus cuideachd na farpaisich a thug beò an tachartas agus a rinn uimhir gus Gàidhlig agus a cultar fhoillseachadh cho soirbheachail agus le uimhir de shnas agus ealantas.
Mìle buidheachas dhaibh uile! Bhuannaich na h-uile a bha an sàs ann an dòigh air choreigin, agus bhuannaich an cànan anns a h-uile dòigh!
Tha mi air iomradh a thoirt air cuid de dhìleab a’ Mhòid seo ann an àite eile san iris seo agus mar a tha mi a’ mìneachadh an sin, tha mi den bheachd gun deach gu mòr ri ìomhaigh agus inbhe na Gàidhlig rè na seachdaine agus gun deach aithne oifigeil a dhaingneachadh air luach an tachartais ann am beatha agus fàs na Gàidhlig.
Ged ‘s e ceum sònraichte a tha sin dhan Mhòd, tha buanachd agus fàs na Gàidhlig fhathast na fhìor dhùbhlan tomadach agus tha obair mhòr ri dhèanamh gus luchd-labhairt a bhrosnachadh gus an cànan a chleachdadh barrachd nam beatha làitheil agus cuideachd barrachd dhaoine a mhisneachadh gus Gàidhlig ionnsachadh.
Mar a tha fios againn uile, tha àireamhan luchd-cleachdaidh bunaiteach ma tha Gàidhlig gu bhith beò agus dol a mhairsinn agus tha buaidh na h-iomairt sin gu mòr an urra rinne mar choimhearsnachd Ghàidheal.
A’ tilleadh gu dìleab a’ Mhòid ‘s fhiach cuimhneachadh gum bheil measadh neo-eisimeil ga dhèanamh gach bliadhna air an toradh eaconamach a tha gach Mòd a’ buileachadh air an sgìre sam bi e a’ gabhail àite.
Tuigear gum bheil am fiosrachadh a thig à leithid sin de rannsachadh na chuideachadh mòr ann an tagraidhean le buidhnean-taice, agus tha e inntinneach da-rìribh gum bheil eadar a dhà agus trì gu leth millean de bhuannachd a’ tighinn gu sgìrean a’ Mhòid gach bliadhna. Clabag luachmhor dha gnìomhachas aoigheachd nam bailtean is nan sgìrean sin, ach ged is e sin an raon as motha a choisinneas bhuaithe, ann am beachd mhòran sin cuideachd an roinn as lugha a nì dad gus an obair-deasachaidh agus lìbhrigidh a chuideachadh. Gun teagamh tha cuid eadar-dhealaichte agus taiceil da-rìribh, ach anns an fharsaingeachd tha gnìomhachasan leisg cuideachadh. Le airgead poblach agus prìobhaideach a’ sìor fhàs gann tha feum gu bhith air a h-uile taic sna bliadhnaichean tha tighinn, agus dh’fhaodadh gnìomhachasan bhailtean nam Mòdan mòran a dhèanamh mar thaic dhan Ghàidhlig agus dha na Mòdan nach cosgadh cus dhaibh idir. Cosnadh an cuid den dìleab!
THE ROYAL National Mòd makes a significant contribution to Gaelic each year and independent research annually confirms that host areas gain substantial economic benefit.
With such benefits, and with some notable exceptions, business communities should do more to support Gaelic.